محکمہ موسمیات نے کراچی سمیت سندھ، جنوبی پنجاب اور بلوچستان کے مختلف حصوں میں آج بھی ہیٹ ویو اور درجہ حرارت معمول سے 7 ڈگری تک زائد رہنے کی پیشگوئی کی ہے۔
رپورٹ کے مطابق لاہور، پشاور، سرگودھا اور ملتان سمیت متعدد شہروں میں درجہ حرارت 40 ڈگری یا زائد رہنے کا امکان ہے جبکہ سکھر، نوابشاہ، مٹھی، سبی اور تربت میں 45 ڈگری سینٹی گریڈ یا زائد رہنے کی پیشگوئی ہے۔
محکمہ موسمیات کے مطابق گزشتہ روز سب سے زیادہ درجہ حرارت نوابشاہ میں 48 ڈگری ریکارڈ کیا گیا۔
محکمہ موسمیات کے مطابق کراچی میں زیادہ سے زیادہ درجہ حرارت 36 سے 38 ڈگری سینٹی گریڈ تک رہنے کا امکان ہے، ہوا میں نمی کا تناسب 76 فیصد ہے اور سمندری ہوائیں 9 کلو میٹر فی گھنٹہ کی رفتار سے چل رہی ہیں۔
محکمہ موسمیات نے آئندہ 24 گھنٹوں کے دوران شدید گرمی کی پیشگوئی کی ہے، ہوا میں نمی کے باعث گرمی کا احساس 41 سے 43 ڈگری سینٹی گریڈ تک ہوسکتا ہے۔
