جنوبی امریکی ملک کولمبیا میں یلو فیور میں مبتلا درجنوں افراد اپنی جانوں سے ہاتھ دھو بیٹھے، جس کے بعد ہیلتھ ایمرجنسی نافذ کردی گئی۔
غیر ملکی میڈیا کے مطابق کولمبیا میں یلوفیور کے کیسز میں تیزی سے اضافہ ہو رہا ہے جس کے سبب اب تک 34 افراد ہلاک ہوچکے اور متعدد اسپتالوں میں زیر علاج ہیں۔
میڈیا رپورٹس کے مطابق صحت کی صورتحال کو مدنظر رکھتے ہوئے حکومت کی جانب سے ہیلتھ ایمرجنسی نافذ کردی گئی ہے۔
یلوفیور کیا ہے؟
یلوفیور مچھروں کے ذریعے انسانوں میں منتقل ہونیوالے وائرس کی وجہ سے ہوتا ہے اور اسے ویکسین کے ذریعے روکا جا سکتا ہے۔
اس حوالے سے حکومت نے عوام پر زور دیا گیا ہے کہ وہ ایسٹر ویک اینڈ سے پہلے ویکسین لگوائیں کیونکہ ایسٹر کے ویک اینڈ کی وجہ سے لوگ گرم علاقوں کا سفر کرتے ہیں جہاں بیماری پھیلانے والے مچھر زیادہ ہوتے ہیں۔
علاوہ ازیں وزیر صحت نے بھی صورتحال سے آگاہ کرتے ہوئے کہا ہے کہ ملک بھر میں اس بخار میں مبتلا 74 کیسز کی تصدیق ہوئی ہے جبکہ انہوں نے عوام کو مفت فراہم کی جانیوالی ویکسین لگوانے پر بھی زور دیا ہے۔
بخار کی علامتیں کیا ہے؟
ڈبلیو ایچ او کی جانب سے بتایا گیا ہے کہ زیادہ تر لوگ انفیکشن کے پہلے مرحلے کے بعد صحتیاب ہوجاتے ہیں جس میں عام طور پر بخار، پٹھوں اور کمر میں درد، سر درد، کانپنا، بھوک نہ لگنا اور متلی یا الٹی شامل ہوتی ہیں۔
تاہم ڈبلیو ایچ او نے خبردار کیا ہے کہ تقریباً 15 فیصد لوگوں کو اس بخار کے دوسرے مرحلے کا سامنا کرنا پڑتا ہے جس میں تیز بخار، یرقان، خون بہنا اور گردے کی خرابی شامل ہوتی ہے اور جن مریضوں کی صحت زیادہ بگڑ جاتی ہے وہ 10 سے 14 دن میں موت کے منہ میں چلے جاتے ہیں۔
