جماعت اسلامی کے سابق نائب امیر پروفیسر خورشید احمد برطانیہ کے شہر لیسٹر میں انتقال کر گئے، ان کی عمر 93 برس تھی اور وہ ماہر تعلیم، ماہر اقتصادیات، ہمہ گیر مصنف اور مبلغ اسلام تھے۔
سابق سینیٹر، وفاقی وزیر اور جماعت اسلامی کے نائب امیر پروفیسرخورشید احمد 23 مارچ 1932 کو نئی دہلی میں پیدا ہوئے، انہوں نے قانون اور اس کے مبادیات میں گریجویشن کی ڈگری حاصل کی، اکنامکس اور اسلامیات میں ایم اے کی ڈگری حاصل کی جبکہ ایجوکیشن میں یونیورسٹی کی طرف سے انہیں اعزازی ڈگری عطا کی گئی۔
پروفیسر خورشید احمد 1949 میں اسلامی جمعیت طلبہ کے رکن بنے، 1953 میں ناظم اعلیٰ منتخب کیا گیا، 1956 میں جماعت اسلامی میں باضابطہ طور پر شامل ہو گئے۔
پروفیسر خورشید انگریزی اور اردو کی ستر کتابوں کے منصف بھی تھے۔
پروفیسر خورشید 1978 میں وفاقی وزیر منصوبہ بندی و ترقی بنے، وہ حکومت پاکستان کے پلاننگ کمیشن کے ڈپٹی چیئرمین بھی رہے جبکہ 1985، 1997 اور 2002 میں سینیٹ آف پاکستان کے رکن منتخب ہوئے اور سینٹ کی قائمہ کمیٹی امور اقتصادی و منصوبہ بندی کے چیئرمین کے طور پر کام بھی کیا۔
