اسلام آباد یونائیٹڈ کے ٹاپ آرڈر بیٹر کولن منرو نے پاکستان سپر لیگ (پی ایس ایل) سیزن 10 کے افتتاحی میچ میں نیا ریکارڈ اپنے نام کرلیا۔
پی ایس ایل کے جمعہ کو افتتاحی میچ میں دفاعی چیمپئن اسلام آباد یونائیٹڈ نے لاہور قلندرز کو 8 وکٹ سے شکست دی۔
راولپنڈی اسٹیڈیم میں کھیلے جانے والے میچ میں اسلام آباد یونائیٹڈ نے لاہور قلندرز کا 140 رنز کا ہدف 18 ویں اوور میں حاصل کیا۔
جارح مزاج بیٹر کولن منرو نے 42 گیندوں پر 59 رنز کی ناقابل شکست اننگز کھیل کر اسلام آباد یونائیٹڈ کی جیت میں کلیدی کردار ادا کیا۔
اس ففٹی کے ساتھ بائیں ہاتھ کے بیٹر کولن منرو نے کوئٹہ گلیڈی ایٹرز کے سابق کپتان رائیلی روسو کا ریکارڈ توڑ دیا۔
کولن منرو اب پی ایس ایل کی تاریخ میں سب سے زیادہ ففٹیز اسکور کرنے والے غیر ملکی کھلاڑی بن گئے۔
لاہور کے خلاف نصف سنچری کولن منرو کی پی ایس ایل میں 13ویں ففٹی تھی، جس سے انہوں نے رائیلی روسو کا 12 نصف سنچریوں کا ریکارڈ توڑا۔
پی ایس ایل میں سب سے زیاد ففٹی اسکور کرنیوالے غیر ملکی بیٹرز میں لیوک رونکی، جیسن رائے اور شین واٹسن بھی شامل ہیں۔
