انٹربینک مارکیٹ میں پیر کو کاروبار کے دوران امریکی ڈالر کے مقابلے روپے کی قدر میں معمولی اضافہ دیکھا گیا۔
کرنسی ڈیلرز کے مطابق ڈالر کے مقابلے روپیہ 5 پیسے کی بہتری سے280.42 روپے کا ہوگیا۔
گزشتہ ہفتے انٹربینک مارکیٹ میں ڈالر کے مقابلے میں روپیہ 0.31 روپے یا 0.11 فیصد کی کمی سے 280.47 روپے پر بند ہوا تھا۔
دوسری جانب بین الاقوامی سطح پر سرمایہ کاروں نے پیرکو محفوظ کرنسیوں جیسے ین اور سوئس فرانک میں سرمایہ کاری کی اور امریکی صدر ڈونلڈ ٹرمپ کی وسیع ٹیرف پالیسیوں کی وجہ سے مارکیٹ کی مندی میں اضافے اور عالمی کساد بازاری کے خدشات کے باعث خطرے سے حساس آسٹریلوی ڈالر کو بڑے پیمانے پر بیچ ڈالا۔
ایشیا کے اسٹاک مارکیٹس اور وال اسٹریٹ فیوچرز میں بڑی گراوٹ آئی اور سرمایہ کاروں کا خیال تھا کہ کساد بازاری کے بڑھتے ہوئے خطرات کے پیش نظر امریکی شرح سود میں مئی تک کمی آسکتی ہے۔
امریکی ڈالر ین کے مقابلے میں 0.45 فیصد کی کمی کے ساتھ 146.21 پر بند ہوا ، لیکن سیشن کے آغاز میں جاپانی کرنسی کے مقابلے میں 1 فیصد سے زیادہ کی کمی کے بعد کچھ نقصانات کم کر لیے۔
سوئس فرانک 0.6 فیصد سے زائد اضافے کے ساتھ 0.8548 فی امریکی ڈالر تک پہنچ گیا جس سے گزشتہ ہفتے گرین بیک کے مقابلے میں اس میں 2.3 فیصد اضافہ ہوا۔
