حکومت نے عوام کو بجلی کے نرخوں میں بڑا ریلیف دینے کا اعلان کر دیا ہے جس سے گھریلو، کمرشل، صنعتی اور جنرل سروسز کے صارفین کو نمایاں فائدہ پہنچے گا اور اس ریلیف پیکیج کے تحت اوسط ٹیرف میں 7 روپے 41 پیسے فی یونٹ کمی کی گئی ہے جس کے بعد قومی اوسط ٹیرف 37 روپے 64 پیسے مقرر ہو گیا ہے۔
گھریلو صارفین کے لیے ریلیف
گھریلو صارفین کو اس پیکیج سے بڑی سہولت ملے گی تاہم 50 یونٹ تک استعمال کرنے والے لائف لائن صارفین کا بل 239 روپے اور 51 سے 100 یونٹ والوں کا بل 937 روپے برقرار رہے گا۔
1 سے 100 یونٹ استعمال کرنے والے نان پروٹیکٹڈ صارفین کا بل 1467 روپے سے کم ہو کر 852 روپے ہو گیا۔
200 یونٹ استعمال کرنے والوں کا بل 3530 روپے سے کم ہو کر 2302 روپے، 300 یونٹ والوں کا 12 ہزار 378 روپے سے 10 ہزار 209 روپے، اور 400 یونٹ سے زائد استعمال کرنے والوں کا بل 22 ہزار 280 روپے سے کم ہو کر 19 ہزار 384 روپے ہو گیا۔
کمرشل صارفین کے لیے فائدہ
کمرشل صارفین کے لیے فی یونٹ قیمت میں 8 روپے 58 پیسے کی کمی کی گئی ہے جس کے بعد نرخ 71 روپے 6 پیسے سے کم ہو کر 62 روپے 47 پیسے فی یونٹ ہو گیا۔
1000 یونٹ استعمال کرنے والے کمرشل صارفین کا بل اب 71 ہزار روپے کے بجائے 62 ہزار 470 روپے آئے گا۔
صنعتی صارفین کو ریلیف
صنعتی صارفین کے لیے بجلی کی قیمت میں 7 روپے 69 پیسے فی یونٹ کمی کے بعد نرخ 40 روپے 51 پیسے فی یونٹ مقرر ہوا۔
1200 یونٹ استعمال کرنے والے صنعتی صارفین کا بل 57 ہزار 828 روپے سے کم ہو کر 48 ہزار 612 روپے ہو گیا۔
جنرل سروسز اور زرعی صارفین
جنرل سروسز کے لیے بجلی کی قیمت میں 7 روپے 18 پیسے کی کمی کی گئی جس کے بعد فی یونٹ قیمت 49 روپے 48 پیسے ہو گئی۔
1500 یونٹ استعمال کرنے والوں کا بل 84 ہزار 990 روپے سے کم ہو کر 72 ہزار 735 روپے ہو گا۔
زرعی صارفین کے لیے 1600 یونٹس کا بل 66 ہزار 816 روپے سے کم ہو کر 55 ہزار 328 روپے کر دیا گیا۔
یہ ریلیف پیکیج مختلف کیٹگریز کے صارفین کے لیے مالی بوجھ کم کرنے میں مددگار ثابت ہوگا اور معاشی سرگرمیوں کو فروغ دے گا۔
