پاکستان تحریک انصاف ( پی ٹی آئی ) پنجاب کے قائم مقام صدر حماد اظہر نے پارٹی عہدے سے استعفیٰ دیدیا۔
پی ٹی آئی رہنما اعظم سواتی کے الزامات کے بعد سیکرٹری جنرل اور قائم مقام صدر پی ٹی آئی پنجاب حماد اظہر پارٹی عہدہ سے مستعفی ہوگئے ہیں اور انہوں نے پارٹی کے تمام عہدے چھوڑنے کا اعلان کردیا ہے۔
اس حوالے سے جاری اپنے خصوصی بیان میں حماد اظہر کا کہنا تھا کہ اعظم سواتی نے بانی پی ٹی آئی کو بتایا کہ عالیہ حمزہ کے کام میں رکاوٹ ڈالی جا رہی ہے جس پر بانی پی ٹی آئی نے سوال کیا کہ کون رکاوٹ ڈال رہا ہے تو اعظم سواتی نے میرا نام لیا۔
حماد اظہر کا کہنا تھا کہ عالیہ حمزہ سے پوچھا کہ آپکو میری طرف سے کبھی رکاوٹ ملی تو انہوں نے تعجب کا اظہار کیا۔
ان کا کہنا تھا کہ مسئلے کا بڑا آسان حل موجود ہے، میرے اختیارات پہلے ہی 4 ریجنل صدور کو پچھلے سال جون میں منتقل کر دئیے گئے تھے اور اب میرے حلقے کی تنظیم بھی میرے مشورے یا مرضی سے نہیں لگ سکی۔
انہوں نے کہا کہ پہلے دو باراستعفیٰ دے چکا ہوں جس کو رد کیا گیا تھا لیکن آج تیسری دفعہ اور حتمی طور پر اپناعہدہ چھوڑ رہا ہوں جبکہ ایک کارکن کی حییثت سے آئندہ اپنے قائد کیلئے کام کروں گا۔
حماد اظہر کا مزید کہنا تھا کہ میرا یہ استعفی ناقابل واپسی ہے اور آئندہ کیلئے کسی عہدے کا خواہشمند نہیں ہوں۔
