پراپرٹی سیکٹر میں سرگرمیوں کو فروغ دینے کے لیے اہم پیش رفت سامنے آئی ہے۔
ذرائع وزارت خزانہ کے مطابق بین الاقوامی مالیاتی فنڈ (آئی ایم ایف) نے پراپرٹی کی پہلی ٹرانزیکشن پر فیڈرل ایکسائز ڈیوٹی (ایف ای ڈی) ختم کرنے کی تجویز پر آمادگی ظاہر کی ہے۔
اس اقدام کا مقصد رئیل اسٹیٹ سیکٹر میں کاروبار کو حوصلہ افزائی اور معاشی سرگرمیوں کو بڑھاوا دینا ہے۔
فی الحال پراپرٹی ٹرانزیکشنز پر ایف ای ڈی کی شرح فائلرز کے لیے 3 فیصد، لیٹ فائلرز کے لیے 5 فیصد، اور نان فائلرز کے لیے 7 فیصد مقرر ہے۔
ذرائع کے مطابق اگر یہ تجویز منظور ہو جاتی ہے تو پہلی پراپرٹی ٹرانزیکشن پر ایف ای ڈی مکمل طور پر ختم کر دی جائے گی تاہم اس کے بعد ہر اگلی ٹرانزیکشن پر موجودہ شرح کے مطابق ٹیکس وصول کیا جائے گا۔
ایف بی آر ذرائع نے واضح کیا کہ پراپرٹی سیکٹر میں دیگر ودہولڈنگ ٹیکسز برقرار رہیں گے جبکہ پراپرٹی فروخت کرنے والوں پر ٹیکس کی موجودہ شرح میں بھی کوئی تبدیلی نہیں کی جائے گی۔
آئی ایم ایف نے رئیل اسٹیٹ سیکٹر میں دیگر ٹیکسز میں کمی کی تجویز کی مخالفت کی ہے جس سے ظاہر ہوتا ہے کہ ریلیف صرف پہلی ٹرانزیکشن تک محدود ہوگا۔
ماہرین کا خیال ہے کہ یہ چھوٹ پراپرٹی سیکٹر میں سرمایہ کاری کو فروغ دے گی اور خاص طور پر پہلی بار گھر خریدنے والوں کے لیے سہولت پیدا کرے گی۔
تاہم حتمی فیصلہ آئی ایم ایف کے ساتھ مذاکرات اور حکومتی پالیسی کی منظوری سے مشروط ہوگا۔
اگر یہ تجویز نافذ ہوتی ہے تو اس سے نہ صرف پراپرٹی مارکیٹ میں تیزی آئے گی بلکہ معاشی سرگرمیوں کو بھی استحکام ملے گا۔
