سندھ حکومت نے پولیس کی تفتیشی صلاحیت کو مزید بہتر بنانے کے لیے 2 ہزار اے ایس آئی انویسٹیگیشن بھرتی کرنے کا فیصلہ کیا ہے۔
چیف سیکریٹری سندھ آصف حیدر شاہ کی زیر صدارت سروس اسٹرکچر کمیٹی کے اجلاس میں فیصلہ کیا گیا ہے، سندھ پولیس میں دو ہزار اے ایس آئی انویسٹیگیشن بھرتی کئے جائیں گےاجلاس میں ایڈیشنل چیف سیکریٹری داخلہ، آئی جی سندھ،سیکریٹری فنانس، سیکریٹری سروسز اور دیگر افسران شریک ہوئے۔
چیف سیکریٹری سندھ نے کہا کہ اس اقدام سے پولیس کی انویسٹیگیشن برانچ کو بہتر بنا کر جرائم پر قابو پایا جا سکے گا۔ آئی جی سندھ غلام نبی میمن نے کہا کہ اے ایس آئی انویسٹیگیشن کی بھرتی سے تفتیش کے معیار میں بہتری آئے گی۔
اجلاس میں کراچی پولیس کی ایک ہزار اڑتیس پوسٹس کو نان انویسٹیگیشن سے انویسٹیگیشن یونٹس میں منتقل کرنے کی منظوری دی گئی۔ اس کے تحت2 ایس پیز،17 ڈی ایس پیز، 114 انسپکٹرز، 308 سب انسپکٹرز اور 588 کانسٹیبلز کو نان انویسٹیگیشن یونٹس سے کراچی رینج کے انویسٹیگیشن یونٹس میں منتقل کیا جائے گا۔
