منشیات کی اسمگلنگ اور سپلائی کیس میں پولیس کی معروف اداکار ساجد حسن کے بیٹے ساحر حسن کا مقدمہ کمزور کرنے کی کوشش، کراچی کی مقامی عدالت نے پولیس کا پیش کردہ عبوری چالان منظور کرنے سے انکار کرتے ہوئے واپس کردیا۔
مصطفیٰ عامر قتل کیس کے بعد منظر عام پر آنے والے منشیات اسمگلنگ اور سپلائی کیس میں گرفتار اداکار ساجد حسن کے بیٹے ملزم ساحر حسن کے تفتیشی افسر نے خاموشی سے عبوری چالان عدالت میں جمع کرایا تھا۔
عبوری چالان میں بازل عاشق نامی ملزم کو مفرور جبکہ ساحر حسن کی چرس اور ویڈ پینے، خریدنے اور پودا کاشت کرنے کا ذکر ہے۔ عدالت نے ریمارکس دیئے کہ ڈسٹرکٹ پراسیکیوٹر شکیل عباسی کے اعتراضات ختم کئے جائیں، ڈسٹرکٹ پراسیکیوٹر شکیل عباسی کے چالان پر اعتراضات کو نظر انداز کیوں کیا گیا؟۔
عبوری چالان میں منیشات کی رقم وصول کرنے والے ساجد حسن کے منیجر، بینک اکاؤنٹس، شریک ملزموں کا ذکر نہیں ہے۔ عدالت نے اعتراض اٹھایا کہ عبوری چالان میں کہیں نہیں لکھا کہ ساحر حسن منشیات کس سے لیتا تھا؟، کس کس کو سپلائی کرتا تھا۔
تفتیشی افسر نے ایک ملزم یحییٰ کا نام کالم نمبر دو میں رکھا ہے کہ اس کیخلاف ثبوت نہیں۔ پولیس نے 19 مارچ کو عبوری چالان پیش کیا تھا۔
