خصوصی سرمایہ کاری سہولت کونسل (ایس آئی ایف سی) کی ایگزیکٹو کمیٹی نے اپنے تیرہویں اجلاس میں بلوچستان، پنجاب اور سندھ میں موٹروے اور شاہراہوں کے منصوبوں کی رفتار تیز کرنے کی ہدایت جاری کردی۔
وفاقی وزیر منصوبہ بندی احسن اقبال کی زیر صدارت ہونے والے اجلاس میں مختلف منصوبوں اور پالیسی اقدامات کی پیشرفت کا تفصیلی جائزہ لیا گیا۔
کمیٹی نے کنیکٹیویٹی، انفراسٹرکچر، تیل و گیس، اور بندرگاہوں وبحری امور جیسے اہم شعبوں پر تبادلہ خیال کیا۔
اجلاس میں بندرگاہوں سے منسلک سڑکوں کی تعمیر کے لیے پبلک پرائیویٹ پارٹنرشپ ماڈل اپنانے پر زور دیا گیا جبکہ بین الوزارتی امور کے حل کے لیے پالیسی اقدامات اور متعلقہ فریقین سے مشاورت کو تیز کرنے کی ہدایت کی گئی۔
کمیٹی نے اہم ترقیاتی منصوبوں کی بروقت تکمیل کے لیے واضح حکمت عملی ترتیب دینے کا فیصلہ کیا اور معاشی ترقی کے لیے ناگزیر انفراسٹرکچر کی تعمیر اور سرمایہ کاری میں تیزی لانے کے عزم کا اعادہ کیا۔
