کوالالمپور میں کھیلے گئے ایک سنسنی خیز ٹی ٹوئنٹی انٹرنیشنل میچ میں ہانگ کانگ نے بحرین کو سپر اوور میں شکست دے دی لیکن اس میچ نے کرکٹ کی تاریخ میں ایک ناقابل یقین واقعہ رقم کیا۔
پہلی بار کسی ٹیم نے سپر اوور میں ایک بھی رن بنائے بغیر اپنی تمام وکٹیں گنوا دیں اور یہ مینز ٹی ٹوئنٹی انٹرنیشنل کی 16 سالہ سپر اوور تاریخ میں پہلا موقع ہے جب کوئی ٹیم اس طرح ’0‘ پر آؤٹ ہوئی۔
میچ میں ہانگ کانگ نے پہلے بیٹنگ کرتے ہوئے 7 وکٹوں کے نقصان پر 129 رنز کا مجموعہ ترتیب دیا۔
جواب میں بحرین کے کپتان احمر بن ناصر نے آخری اوور میں چھکا لگا کر میچ برابر کر دیا لیکن بدقسمتی سے آخری گیند پر آؤٹ ہوگئے جس کے بعد میچ کا فیصلہ سپر اوور سے ہوا۔
سپر اوور میں بحرین کی بیٹنگ شروع ہوئی لیکن ناصر اور سہیل احمد لگاتار گیندوں پر آؤٹ ہوگئے۔
نتیجتاً بحرین کی ٹیم بغیر کوئی رن بنائے ’0‘ پر ڈھیر ہوگئی۔
دوسری جانب ہانگ کانگ نے یہ آسان ہدف محض تیسری گیند پر حاصل کر لیا اور فتح اپنے نام کی۔
دلچسپ بات یہ ہے کہ یہ 33 واں مینز ٹی ٹوئنٹی انٹرنیشنل میچ تھا جس کا نتیجہ سپر اوور سے نکلا، بحرین اس سے قبل دو بار سپر اوور میں کامیابی حاصل کر چکی تھی لیکن اس بار اسے تاریخی شکست کا سامنا کرنا پڑا۔
