ماہرینِ فلکیات نے عیدالفطر 2025ء کی متوقع تاریخوں کے حوالے سے پیشگوئیاں جاری کردیں، تاہم مصری اور اماراتی ماہرین کے تجزیے ایک دوسرے کے مد مقابل آگئے ہیں۔
عرب میڈیا کے مطابق مصر کے نیشنل انسٹی ٹیوٹ فار آسٹرونومیکل اینڈ جیو فزیکل ریسرچ نے پیشگوئی کی ہے کہ عرب دنیا میں رمضان المبارک 29 دن اور آخری روزہ 29 مارچ (ہفتہ) کو ہوگا، جبکہ عیدالفطر 30 مارچ (اتوار) کو ہونے کا قوی امکان ہے۔
مصری ماہرین کے مطابق دنیا کے تقریباً 30 شہروں میں 29 مارچ کو شوال کا چاند نظر آنے کا امکان ہے، جن میں مکہ مکرمہ، مدینہ منورہ، ریاض، انقرہ، تہران، مسقط، کراچی، لندن، ماسکو اور اوٹاوہ شامل ہیں۔
واضح رہے کہ پاکستان میں رمضان المبارک کا آغاز 2 مارچ کو ہوا تھا، اس حساب سے 29 مارچ کو ملک میں 28 واں روزہ ہوگا، اس لئے یہاں شوال کا چاند نظر آنے کا امکان نہیں ہے، کیونکہ اسلامی مہینہ کم سے کم 29 دن کا ہوتا ہے۔
دوسری جانب اماراتی آسٹرونومی سوسائٹی کے چیئرمین ابراہیم الجروان کے مطابق عرب دنیا میں عید الفطر 30 مارچ (اتوار) یا 31 مارچ (پیر) کو ہوسکتی ہے۔
ان کا کہنا ہے کہ 29 مارچ کو دوپہر 2:58 بجے (مقامی وقت) پر شوال کا چاند پیدا ہوگا لیکن چونکہ سورج غروب ہونے تک چاند کی عمر صرف 3 گھنٹے ہوگی، اس لیے چاند دیکھنا مشکل ہوسکتا ہے، اگر ایسا ہوا تو عید 31 مارچ (پیر) کو منائی جائے گی۔
