وزیراعظم شہباز شریف کا کہنا ہے کہ دانش یونیورسٹی عوام کی ملکیت ہوگی، 190 ملین پاؤنڈ کی خطیر رقم سے بنا رہے ہیں، جسٹس فائز عیسیٰ اور یحییٰ آفریدی کا شکریہ جنہوں نے عوام کا پیسہ قومی خزانے میں ٹرانسفر کیا، قومیں امداد نہیں محنت اور میرٹ سے ترقی کرتی ہیں، دانش یونیورسٹی میں میرٹ کے علاوہ کسی کو داخلہ نہیں ملے گا، چاروں صوبوں، آزاد کشمیر اور گلگت بلتستان سے بچے پڑھنے آئیں گے۔
وزیرِ اعظم شہباز شریف نے اسلام آباد میں دانش یونیورسٹی آف ایمرجنگ سائنسز کے سائٹ ریویو کی تقریب میں شرکت کی۔ اس موقع پر خطاب کرتے ہوئے انہوں نے کہا کہ اسلام آباد میں دانش یونیورسٹی ناصرف ملک میں ایک ماڈل ہوگی بلکہ معیاری تعلیم، تحقیق اور اپلائیڈ سائنسز میں ترقی کی بنیاد پر دنیا کے اعلیٰ تعلیمی مراکز میں بھی نمایاں مقام حاصل کرے گی، ہم سب کیلئے خوشی کا لمحہ ہے، آج دانش یونیورسٹی کے قیام کیلئے 100 ایکڑ زمین مختص کی گئی ہے۔
وزیراعظم نے کہا کہ اس میں کوئی شک نہیں کہ ملک کے مختلف صوبوں میں اچھے تعلیمی مراکز موجود ہیں لیکن جدید اپلائیڈ سائنسز کیلئے کوئی مناسب ریسرچ اینڈ ڈیولپمنٹ ایجوکیشنل سینٹر موجود نہیں۔ انہوں نے امید کا اظہار کیا کہ دانش یونیورسٹی اسٹینفورڈ، آکسفورڈ، ایم آئی آئی ٹی اور دیگر عالمی شہرت یافتہ تعلیمی اداروں کے ہم پلہ ہو گی۔
شہباز شریف نے مزید کہا کہ 14 اگست 2026ء کو یونیورسٹی کا پہلا سیکشن فعال ہو جائے گا، حکومت کا دانش یونیورسٹی کے کاموں اور انتظامیہ سے کوئی تعلق نہیں ہوگا کیونکہ یہ پی کے ایل آئی کی طرح خود مختاری سے کام کرے گی، ملک بھر سے طلبا جامعہ کی مختلف فیکلٹیوں میں خالصتاً میرٹ کی بنیاد پر داخلہ لیں گے، جس کا ایک ٹرسٹ بنایا جائے گا اور ابتدائی طور پر حکومت 10 ارب روپے سیڈ منی کے طور پر فراہم کرے گی اور بعد میں امیر طلباء کی فیسوں سے جمع ہونے والی رقم سے یونیورسٹی کو چلایا جائے گا اور غریب طلباء کی مدد کی جائے گی۔
وزیراعظم نے کہا کہ دانش یونیورسٹی کے بورڈ آف گورنرز کے ناموں کو حتمی شکل دے دی گئی ہے تاکہ ذہین افراد اپنا کردار ادا کر سکیں، دانش یونیورسٹی کیمپس سرخ پتھر کے ساتھ تعمیر کیا جائے گا جس میں تمام متعلقہ سہولیات موجود ہوں گی۔
شہباز شریف نے پنجاب بھر میں دانش اسکولوں کے کام کے بارے میں کہا کہ وہاں بڑی تعداد میں یتیم اور غریب طلباء تعلیم حاصل کر رہے ہیں، مفت تعلیم، اسمارٹ بورڈز، آئی ٹی سمیت دیگر سہولیات سے لیس یہ مراکز پسماندہ علاقوں کے طلباء کو معیاری تعلیم کی تمام سہولیات فراہم کر رہے ہیں۔
وفاقی وزیر برائے تعلیم خالد مقبول صدیقی نے اپنے خطاب میں اس بات پر روشنی ڈالی کہ سائنس اور ٹیکنالوجی میں جدید رجحانات حاصل کرکے دنیا بدل گئی ہے۔ انہوں نے قوم اور ملک کے ساتھ وعدہ کیا کہ اس طرح کے اقدامات سے ملک کے روشن مستقبل کیلئے تعلیم اور دانش کو فروغ دیا جائے گا۔
وفاقی وزیر نے کہا کہ آج ایک ایسے تعلیمی مرکز کی بنیاد رکھی جا رہی ہے جو صوبوں کیلئے ایک ماڈل ہوگا۔
منصوبہ بندی، ترقی اور خصوصی اقدامات کے وفاقی وزیر احسن اقبال نے تقریب سے خطاب کرتے ہوئے کہا کہ آج ایک تاریخی دن ہے، جو وزیر اعظم کے تعلیم دوست وژن سے ہم آہنگ ہے۔ انہوں نے کہا کہ دانش یونیورسٹی نیکسٹ لیول یونیورسٹی ہوگی جہاں صنعتی انقلاب کیلئے افرادی قوت تیار کی جائے گی۔
احسن اقبال کا کہنا ہے کہ یونیورسٹی میں مصنوعی ذہانت، بائیو ٹیکنالوجی، روبوٹکس، خلائی سائنس اور دیگر ابھرتی ہوئی ٹیکنالوجیز ہر عملی تحقیق کی تعلیم فراہم کرنے کی سہولیات میسر ہوں گی تاکہ اکیڈمیا اور صنعتوں کے درمیان خلا کو پر کرنے کے لیے ایک پلیٹ فارم بنایا جا سکے۔
