چیئرمین تحریک انصاف بیرسٹر گوہر خان نے جعفر ایکسپریس کے مسافروں کو یرغمال بنانے والے دہشت گردوِں کے خلاف جواں مردی کے ساتھ کامیاب آپریشن پر پاک فوج کو خراج تحسین پیش کیا ہے۔
نمائندہ خصوصی سماء سے گفتگو میں بیرسٹر گوہر خان نے کہا کہ دہشت گردی کے واقعہ پر افسوس ہوا ۔ سیکیورٹی فورسز کو کاوشوں کو سراہتے ہیں ۔ پاکستان اور اس کی سلامتی ہمیں سب سے زیادہ عزیز ہے ۔ حکومت پارلیمنٹ کو آن بورڈ لے اور افسوسناک واقعہ پر بریفنگ دے۔
دوسری جانب قومی اسمبلی اجلاس میں اظہار خیال کرتے ہوئے اسدقیصر نے کہا کہ قومی اتفاق رائے کی ضرورت ہے، شفاف الیکشن کے بعد عوام کی نمائندگی سے پارلیمنٹ کوطاقت مل سکتی ہے۔
اسد قیصر نے کہا کہ ہم مطالبہ کرتے ہیں فوری طورپرالیکشن کرائے جائیں، اس پارلیمنٹ میں عوام کی نمائندگی کی قوت نہیں، وہ لوگ اسمبلیوں میں بیٹھے ہیں جن کے پاس حکومت بنانے کا حق نہیں۔ فراڈ الیکشن کےبعدجعلی طریقے سے اسمبلی وجود میں لائی گئی، اصل نمائندوں کوجیلوں میں ڈال کر انکو رکھا گیاجن کاعوام سےتعلق نہیں۔
انہوں نے کہا کہ بلوچستان اور قومی اسمبلی میں عوام کےنمائندے نہیں ہیں، ان میں اخلاقی جرات، شرم اورحیاہوتی تو مستعفی ہوجاتے، خواجہ آصف صرف پی ٹی آئی پر الزام تراشی کرنے پر تلے ہیں، وزیردفاع کے دل ودماغ پرپی ٹی آئی اور سوشل میڈیا سوار ہے۔
