خواجہ آصف کا کہنا ہے کہ صدر کا خطاب اچھا تھا، ایک سالہ پروگرام دیا، حکومت عمل کرے گی، تحریک انصاف دہشت گردوں کی اتحادی بنی ہوئی ہے، دہشت گردی کے خاتمے تک چین سے نہیں بیٹھیں گے۔
وزیر دفاع خواجہ آصف نے میڈیا سے گفتگو کرتے ہوئے کہا ہے کہ دہشتگردی کیخلاف جنگ جاری ہے، کامیابی بھی ہورہی ہے، سیکیورٹی فورسز کی جانب سے مسلسل آپریشنز ہورہے ہیں، افواج کو پچھلے ڈیڑھ ماہ میں کئی کامیابیاں ملی ہیں، دہشتگردوں کے ٹھکانوں کو نشانہ بنایا گیا، بہت سے خوارج مارے گئے ہیں۔
ان کا کہنا ہے کہ بانی پی ٹی آئی کے لگائے پودوں کا قلع قمع ہونے تک یہ جنگ جاری رہے گی، جب تک دہشت گردی کا خاتمہ نہ ہوگا، چین سے نہیں بیٹھیں گے، تحریک انصاف تو دہشت گردوں کی اتحادی بنی ہوئی ہے۔
صحافی نے سوال کیا کہ تحریک انصاف سے متعلق کوئی ثبوت ہے؟، جس پر خواجہ آصف نے جواب دیا کہ کون لایا، کس کے دور میں ہزاروں دہشتگرد یہاں بسائے گئے۔
وزیر دفاع نے کہا کہ صدر مملکت کے خطاب کے دوران احتجاج روایت ہے، صدر کے خطاب کے دوران احتجاج نہ ہو تو ہاضمہ خراب ہوجاتا ہے۔
خواجہ آصف کا کہنا ہے کہ دیامیر بھاشا ڈیم کے معاملات کو ٹھیک ہونا چاہئے، صدر زرداری کا خطاب اچھا تھا ایک سالہ پروگرام دیا، حکومت عمل کرے گی، کوئٹہ لاک ڈاؤن کا مجھے تو کوئی علم نہیں، وزیراعلیٰ کو ہی معلوم ہوگا۔
