وزیراعظم شہباز شریف کی ہدایت پر مائیکرو انٹرپرائزز کو ایس ایم ای سیکٹر کا حصہ بنا دیا گیا ہے۔
وزیراعظم شہباز شریف کی زیر صدارت سمیڈا کی اسٹیئرنگ کمیٹی کا اجلاس ہوا جس میں وزیراعظم نے سمیڈا میں مارکیٹ سے نئی ہنر مند افرادی قوت بھرتی کرنے کی ہدایت بھی کی۔
اجلاس کے دوران بریفنگ میں بتایا گیا کہ وزیراعظم کی ہدایت پر سمیڈا بورڈ میں نجی شعبے کی نمائندگی بڑھائی جا رہی ہے۔
اجلاس سے خطاب کرتے ہوئے وزیر اعظم نے وفاقی سطح پر پیشہ ورانہ تربیت کے تمام اداروں کو ایک ادارے میں ضم کرنے کی ہدایت بھی کی۔
شہباز شریف کا کہنا تھا کہ چھوٹے اور درمیانے درجے کے کاروبار کے فروغ کیلئے ترجیحی بنیاد کام کر رہے ہیں اور سمیڈا میں شفاف طریقے سے بین الاقوامی معیار کی ورک فورس کو بھرتی کیا جائے۔
ان کا کہنا تھا کہ اِس ورک فورس کی تنخواہیں مارکیٹ ریٹس کے مطابق ہونی چاہیے اور ایس ایم ای شعبے کے لئے لیبر کی پیشہ ورانہ تربیت انتہائی ضروری ہے۔
ان کا کہنا تھا کہ سمیڈا کا ہماری دیہی معیشت کے فروغ میں میں اہم کردار ہے اور دیہی خواتین کو سمیڈا کے بلا سود قرض پروگرام کا فائدہ پہنچانے کیلئے لائحہ عمل بنایا جائے۔
