بھارتی کپتان روہت شرما نے آسٹریلیا کو شکست دے کر آئی سی سی چیمپئنز ٹرافی کے فائنل میں رسائی کے بعد اہم اعزاز حاصل کرلیا۔
منگل کو دبئی میں ہونیوالے چیمپئنز ٹرافی کے پہلے سیمی فائنل میں بھارت نے آسٹریلیا کو 4 وکٹوں سے شکست دی اور میگا ایونٹ کے فائنل کیلئے کوالیفائی کرلیا۔
آسٹریلیا نے بھارت کو 265 رنز کا ہدف دیا جو روہت الیون نے 49 ویں اوور میں 6 وکٹوں کے نقصان پر پورا کرکے فائنل میں جگہ پکی کرلی۔
آسٹریلیا کیخلاف شاندار فتح کے بعد روہت شرما دنیا کے پہلے کپتان بن گئے جنہوں نے اپنی ٹیم کو چاروں بڑے آئی سی سی ایونٹس ’’ورلڈ ٹیسٹ چیمپئن شپ، ون ڈے ورلڈ کپ، ٹی 20 ورلڈ کپ اور چیمپئنز ٹرافی‘‘ کے فائنلز میں پہنچایا۔
روہت شرما کی قیادت میں بھارت نے 2023ء میں ورلڈ ٹیسٹ چیمپئن شپ کا فائنل اور پھر ون ڈے ورلڈ کپ کا فائنل کھیلا، دونوں میں اسے آسٹریلیا نے شکست دی۔
روہت شرما کی کپتانی میں بھارت 2024ء کے ٹی 20 ورلڈ کپ کے فائنل میں پہنچا اور جنوبی افریقا کو شکست دے کر دوسری بار چیمپئن بن گیا۔
اب روہت کی کپتانی میں بھارت چیمپئنز ٹرافی 2025ء کے فائنل میں بھی پہنچ گیا ہے، دیکھنا یہ ہے کہ کیا روہت شرما بھارت کو ٹائٹل بھی جتوا پاتے ہیں یا نہیں۔
واضح رہے کہ آئی سی سی چیمپئنز ٹرافی کا دوسرا سیمی فائنل آج جنوبی افریقا اور نیوزی لینڈ کے درمیان لاہور کے قذافی اسٹیڈیم میں کھیلا جائے گا، ایونٹ کا فائنل 9 مارچ کو دبئی میں پاکستان کی میزبانی میں کھیلا جائے گا۔
