وزیراعلیٰ مریم نواز نے پنجاب میں 5 سالہ ٹرانسپورٹ پروگرام کی منظوری دے دی۔
وزیراعلیٰ مریم نواز کی زیر صدارت ٹرانسپورٹ سے متعلق خصوصی ویڈیو لنک اجلاس ہوا جس میں ٹرانسپورٹ پروگرام کی منظوری دی گئی۔
پروگرام کے تحت پنجاب میں جدیدترین آٹومیٹڈ ریپڈ ٹرانسپورٹ سسٹم متعارف کرایا جائے گا جبکہ وزیراعلیٰ پنجاب نے اے آر ٹی کے فوری ٹرائل رن کا بھی حکم دے دیا ہے۔
اس موقع پر خطاب کرتے ہوئے مریم نواز کا کہنا تھا کہ آٹومیٹڈ ریپڈ ٹرانسپورٹ پنجاب بھر میں 4 سال میں مکمل کرنا چاہتے ہیں، جدت کیلئے ہر شہرمیں نیا ٹرانسپورٹ سسٹم ضروری ہے اور ہر شہر میں ”اینڈ ٹو اینڈ“سسٹم متعارف کرانا چاہتے ہیں۔
مریم نواز کا کہنا تھا کہ دور دراز علاقوں کی محرومیاں ختم کرنا چاہتے ہیں، آٹو میٹڈ ریپڈ ٹرانسپورٹ سسٹم چھوٹے شہر میں رہنے والوں کا بھی حق ہے ، جدید ٹرانسپورٹ سسٹم سے لوگوں کے معیار زندگی میں بہتری آئیگی۔
اجلاس کے دوران بریفنگ
اجلاس کے دوران بریفنگ میں بتایا گیا کہ آٹومیٹڈ ریپڈ ٹرانسپورٹ سسٹم ملائیشیاء، ابوظہبی اور قطر سمیت دنیا بھر میں ماس ٹرانزٹ کا کامیاب سسٹم ہے، عام بس کی نسبت اے آرٹی کیلئے روڈ پر کم جگہ درکار ہوگی، اے آر ٹی تین کوچز پر مشتمل بس میں 300 سے زائد مسافروں کی گنجائش ہوگی۔
بریفنگ میں بتایا گیا کہ اے آر ٹی سمارٹ اسٹیشن پر بس کھڑے کھڑے چند منٹ میں چارج ہوجائیگی، اے آر ٹی میں مسافروں کیلئے فاسٹ چارجنگ، وائی، مانیٹرنگ کیمرہ اور دیگر سہولیات میسر ہونگی، اے آر ٹی روایتی فیول کی بجائے مکمل سولرائزڈ سسٹم ہوگا۔
بریفنگ میں بتایا گیا کہ پہلے مرحلے میں لاہور، فیصل آباد اور گوجرانوالہ سمیت دیگر شہروں میں اے آر ٹی سسٹم متعارف کرایا جائیگا، تین مراحل میں دس دس شہروں میں نیا ٹرانسپورٹ سسٹم متعارف کرایا جائیگا اور آٹو میٹڈ ریپڈ ٹرانسپورٹ سسٹم کے ساتھ ہر شہر میں فیڈر بسیں بھی چلائی جائیں گی۔
