وزیراعلیٰ پنجاب مریم نواز کی ہدایت پر اٹلی کے ساتھ ڈیری کے شعبے میں تعاون بڑھانے میں اہم پیش رفت ہوئی ہے۔ اٹلی کی طرز پر پنجاب میں جدید ڈیری فارمنگ، دودھ، پنیر کی پیداوار اور ترسیل کے عالمی معیار کا نظام متعارف کرانے کا فیصلہ کرلیا گیا۔
اٹلی کے ڈیری کے شعبے کے سرمایہ کار وفد نے سینئر صوبائی وزیر پنجاب مریم اورنگزیب اوروزیر لائیو سٹاک عاشق حسین سے ملاقات کی ۔ منصوبے کے پہلے مرحلے میں ایک ہزار بھینسوں کا پہلا آزمائشی منصوبہ پاک پتن ، مظفرگڑھ اور جھنگ میں شروع ہوگا۔
اعلی نسل کی بھینسوں کی افزائش ، دودھ کی پیداوار بڑھانے ، پیکجنگ اور برآمدی معیار بڑھانے پر مل کر کام ہوگا ۔ دودھ ٹھنڈا کرنے اور محفوظ بنانے سمیت ڈیری کے شعبے میں جدید مشینری متعارف ہوگی ۔
مریم اورنگزیب کا کہنا ہے کہ جامع ڈیری پالیسی جلد تیار ہوجائے گی ۔ زیتون کے بعد ڈیری فارمنگ سے پنجاب میں زرعی انقلاب کی رفتار مزیدتیز ہوگی۔ غریب اور سیلاب متاثرہ علاقوں میں ڈیری مصنوعات کا منصوبہ شروع ہونے سے چھوٹے کسان اور خواتین خوش حال ہوں گے۔
منصوبے کے تحت 15 ہزار لائیو اسٹاک کارڈز اور 80 ارب روپے کی سبسڈی سے کسان اور زراعت کو فائدہ ہوا ۔ آسان قیمت پر ٹریکٹر، زرعی مشینوں کی فراہمی سے پنجاب میں زراعت فروغ پا رہی ہے۔
