چیمپئنز ٹرافی میں پاک بھارت میچ سے قبل دبئی کمیونیٹی پولیس نے آن لائن فراڈ سے متعلق وارننگ جاری کردی۔
غیرملکی میڈیا رپورٹس کے مطابق دبئی پولیس کی جانب سے سائبرفراڈ کیخلاف سخت کارروائیاں جاری ہیں، آن لائن فراڈ کی روک تھام کیلئے سیکڑوں ویب سائٹس بھی بلاک کردی گئیں۔
دبئی پولیس حکام نے وارننگ جاری کرتے ہوئے عوام کو خبردار کیا ہے کہ پاک بھارت میچ کے ٹکٹس کی خریداری میں احتیاط سے کام لیں، آن لائن نقالوں سے ہوشیار رہیں اور پاک بھارت میچ کے ٹکٹس کی ’’آن لائن ری سیل‘‘ سے دور رہیں۔
حکام نے کہا کہ متعدد جعلی آن لائن ری سیل ایوینیوز بلاک کردیے گئے ہیں، غیرمعیاری ویب سائٹ پر کریڈٹ کارڈ کی تفصیلات چوری ہوسکتی ہیں، عوام بہت محتاط رہیں، آن لائن دھوکے باز کرکٹ کے جنون سے غلط فائدہ اُٹھا سکتے ہیں، پاک بھارت میچ کا ایک ’’اصلی آن لائن ٹکٹ‘‘ مختلف افراد کو بیچنے کے بھی خدشات ہیں۔
دبئی حکام کے مطابق ہر سال درجنوں فراڈ ویب سائٹس کو بند کیا جاتا ہے، سائبر فراڈ کے ذریعے عوام کو لوٹنے کی کئی کوششیں ناکام بنائی گئی ہیں، آن لائن فراڈ روکنے کیلئے جدید ٹیکنالوجی کا استعمال کیا جارہا ہے۔
دبئی پولیس نے اپیل کی ہے کہ کسی بھی مشکوک ویب سائٹ یا کال کی فوری اطلاع دیں۔
