وزیراعلیٰ خیبرپختونخوا علی امین خان گنڈاپور نے اہم قدم اٹھاتے ہوئے صوبہ بھر کے طلبہ کو مفت لیپ ٹاپ دینے کا اعلان کردیا۔
ایک بیان میں وزیراعلیٰ خیبرپختونخوا علی امین خان گنڈاپور کا کہنا تھا کہ پنجاب میں جتنے فیصد طلبہ کو لیپ ٹاپ دیئے جا رہے ہیں ہم بھی اتنے فیصد دیں گے، انہوں نے مطالبہ کیا کہ وزیراعلیٰ پنجاب مریم نواز حکومت خیبرپختونخوا کی طرز پر اپنے شہریوں کو مفت صحت کارڈ دے۔
وزیراعلیٰ خیبرپختونخوا نے کہا کہ ہم نے اپنی پوری آبادی کو صحت کارڈ دیا، اب لائف انشورنس کی سہولت دے رہے ہیں، حکومت پنجاب بھی اپنی پوری آبادی کو یہ سہولیات دے۔
علی امین گنڈاپور کا کہنا تھا کہ ہم نے مشکل حالات کے باوجود اپنی آمدن میں 55 فیصد اضافہ کیا، پنجاب بھی اپنی آمدن 12 فیصد سے 55 فیصد تک بڑھائے۔
انہوں نے کہا کہ حکومت خیبر پختونخوا کے پاس خزانے میں 176 ارب روپے کا سرپلس پڑا ہے، خیبرپختونخوا واحد صوبہ ہے جس نے آئی ایم ایف کا ٹارگٹ حاصل کیا ہے۔
وزیراعلیٰ خیبرپختونخوا کا کہنا تھا کہ پنجاب کو آئی ایم ایف کی طرف سے 300 ارب روپے سرپلس کا ہدف دیا گیا تھا، حکومت پنجاب نے الٹا 146 ارب روپے کا خسارہ کیا۔
علی امین گنڈاپور نے کہا کہ ہم 4 ہزار مستحق بچیوں کی شادیاں کروا رہے ہیں، 2 لاکھ روپے دے رہے ہیں، چیلنج کرتا ہوں کہ پنجاب کی کارکردگی ہماری ایک فیصد کارکردگی کے برابر بھی نہیں۔
