اسلام آباد میں پچیس فروری سے جشن بہاراں کا آغاز ہوگا جس کیلئے ڈپٹی کمشنر عرفان نواز میمن نے تمام متعلقہ افسران کو بہترین انتظامات یقینی بنانے کی ہدایت کر دی۔
ڈپٹی کمشنر اسلام آباد کی زیرصدارت سہہ روزہ جشن بہاراں میلے کے حوالے سے اجلاس ہوا۔ متعلقہ اسسٹنٹ کمشنرز اور سی ڈی اے سمیت دیگر ضلعی افسران نے شرکت کی۔ اسپورٹس کمپلیکس میں پچیس سے ستائیس فروری تک جشن بہاراں کے انتظامات کا جائزہ لیا گیا۔
ڈی سی عرفان نواز میمن نے کہا اسلام آباد میں جشن بہاراں طویل عرصے بعد ہونے جارہا ہے۔ اگلے ہفتے سے باقاعدہ ریہرسل کا آغاز کیا جائے۔ بریفنگ میں بتایا گیا کہ میلے کے لیے رنگا رنگ اور منفرد پروگرامز ترتیب دئیے گئے ہیں۔
سفیروں اور عام شہریوں کو مدعو کیا جائے گا۔ ڈی سی نے کہا طلباء و طالبات کے بیٹھنے کے لیے الگ جگہ مختص کرنے کے ساتھ بہترین ٹریفک پلان بھی مرتب کیا جائے۔پولیس سیکیورٹی کے فول پروف انتظامات کرے۔
