ایف آئی اے امیگریشن نے کراچی ایئرپورٹ پر کارروائی کرتے ہوئے سینیگال سے براستہ ایتھوپیا کراچی پہنچنے والے 5 مسافروں کو حراست میں لے لیا۔
سمندر کے راستے شہریوں کو یورپ بھجوانے میں ملوث منظم گینگ بے نقاب ہوگیا، سینیگال سے براستہ ایتھوپیا کراچی پہنچنے والے 5 مسافروں نے تفتیش میں اہم انکشافات کیے ہیں۔
حکام کے مطابق افتخار احمد ،نصیر احمد، راشد فاروق، شمریز اور ثقلین مرتضی کا تعلق وزیر آباد، منڈی بہاءالدین، گجرانوالہ اور سیالکوٹ سے ہے۔
افتخار احمد نامی مسافر وزٹ ویزے پر سینیگال اور ثقلین مرتضی دبئی کے راستے موریطانیہ گیا تھا، دیگر 3 مسافر عمرہ ویزہ پر پہلے سعودی عرب پہنچے اور بعد ازاں ایجنٹ نے موریطانیہ بھجوایا۔
مسافر یورپ جانے کے لیے محمد افضل اور علی حسن نامی انسانی سمگلر سے رابطے میں تھے اور ایجنٹ نے مسافروں کو فی کس 35 لاکھ روپے کے عوض قانونی طریقے سے اسپین پہنچانے کا وعدہ کیا۔
موریطانیہ پہنچ کر ایجنٹ نے مسافروں کو غیر قانونی طور یورپ بھجوانے کی کوشش کی تاہم مسافروں نے سمندر کے راستے غیر قانونی سفر کرنے سے انکار کر دیا اور واپس آ گئے۔
مسافروں کو مزید کارروائی کے لیے انسدادِ انسانی اسمگلنگ سرکل منتقل کر دیا گیا۔
