محکمہ داخلہ پنجاب نے انٹرنیشنل کرکٹ کونسل ( آئی سی سی ) چیمپئنز ٹرافی 2025 کے سیکیورٹی انتظامات کیلئے آرمی و رینجرز کی تعیناتی کی منظوری دے دی۔
جمعہ کو چیئرمین کابینہ کمیٹی برائے امن وامان خواجہ سلمان رفیق کی زیرصدارت محکمہ داخلہ میں اہم اجلاس ہوا جس میں سیکرٹری داخلہ نورالامین مینگل نے صوبہ بھر کے امن و امان کی تازہ صورتحال بارے بریفنگ دی۔
کابینہ کمیٹی نے آئی سی سی چیمپئنز ٹرافی کیلئے سکیورٹی انتظامات کا جائزہ لیا اور قذافی اسٹیڈیم لاہور اور راولپنڈی کرکٹ اسٹیڈیم کی جوائنٹ سیکیورٹی آڈٹ رپورٹ کے مطابق فول پروف انتظامات کو یقینی بنانے کی ہدایت کی گئی۔
کابینہ کمیٹی نے کرکٹ سیریز کیلئے آرمی کی پانچ کمپنیوں اوررینجرز کے ایک ونگ کی تعیناتی کی بھی منظوری دی۔
دروان بریفنگ بتایا گیا کہ کرکٹ میچز سے قبل سٹیڈیم کے گرد سیف سٹی کے تمام کیمرے آپریشنل کردیئے گئے ہیں۔
چیئرمین کابینہ کمیٹی برائے امن و امان خواجہ سلمان کا کہنا ہے کہ پاکستان میں بین الاقوامی کرکٹ سیریزکےپرامن انعقاد سے عالمی سطح پر بہتر تشخص اجاگرہوگا۔
