پاکستان ایئرپورٹس اتھارٹی نے ملک کے 2 بین الاقوامی ایئرپورٹس پر جدید ترین ایئر ٹریفک کنٹرول سسٹم نصب کرنے کا فیصلہ کرلیا۔
کراچی اور لاہور کے انٹرنیشنل ایئرپورٹ پر جدید ترین ایئر ٹریفک کنٹرول سسٹم لگانے کی تیاریاں کرلیں، پاکستان ایئر پورٹس اتھارٹی نے منصوبے کا پی سی ون پلان تیار کرلیا۔
ذرائع کے مطابق جدید ترین ایئر ٹریفک کنٹرول سسٹم نصب کرنے پر ابتدائی طور پر 5 سے 6 ارب روپے کی لاگت آئے گی، ایئر ٹریفک کنٹرول سسٹم کے بڑے منصوبے کیلئے منظوری پلاننگ کمیشن دے گا۔
رپورٹ کے مطابق منصوبے کو پلاننگ کمیشن کی سینٹرل ورکنگ ڈیولپمنٹ کمیٹی اجلاس میں پیش کرکے منظوری لی جائے گی، کراچی اور لاہور ایئرپورٹس پر ایئر ٹریفک کنٹرول سسٹم پرانا ہوچکا ہے۔
ذرائع کا کہنا ہے کہ اس وقت دونوں ایئرپورٹس پر پروازوں کو کنٹرول کرنے کیلئے جدید ترین ایئر ٹریفک کنٹرول سسٹم کے نفاذ کی اشد ضرورت ہے، اس وقت اسلام آباد اور نیو گوادر انٹرنیشنل ایئرپورٹ پر جدید ایئر ٹریفک کنٹرول سسٹم نصب ہیں۔
ذرائع کا کہنا ہے کہ نئے جدید ایئر ٹریفک کنٹرول سسٹم لگانے کیلئے ایئرپورٹس اتھارٹی بین الاقوامی ٹینڈر جاری کرے گی۔
