قومی کرکٹ ٹیم کے سابق کپتان بابراعظم کا موبائل گُمشدگی سے متعلق بیان مارکیٹنگ اسٹنٹ نکلا۔
بابراعظم نے اپنا موبائل کھونے یا چوری ہوجانے کی اطلاع سماجی رابطے کی سائٹ انسٹاگرام پر اسٹوری کی صورت میں شیئر کی تھی۔
انہوں نے مداحوں کو اپنے ساتھ پیش آئی پریشانی کے حوالے سے بتایا کہ میرا موبائل فون کھوگیا جس کے بعد سارے رابطے کے نمبر بھی چلے گئے ہیں تاہم اب خبر سامنے آئی ہے کہ یہ ایک مارکیٹنگ اسٹنٹ تھا۔
بابراعظم کی پوسٹ پر مداحوں نے تشویش کا اظہار کرتے ہوئے کرکٹر کو پریشان نہ ہونے کی یقین دہانی کرائی تھی۔
اب نئی پوسٹ میں سابق کپتان نے نجی کمپنی کی مارکیٹنگ کرتے ہوئے بتایا کہ فون مل گیا اور آپ کی تمام پریشانیوں کو بہت سراہا جاتا ہے۔
بابر اعظم نے اپنی پوسٹ پر ہنستے ہوئے ایموجی کو بھی شامل کیا ہے۔
قومی کرکٹر کے فون اسٹنٹ پر کچھ شائقین محظوظ ہوئے جبکہ دیگر نے بابراعظم کو کو مشورہ دیا کہ وہ اپنی فارم پر توجہ مرکوز کریں ناکہ ڈرامے بازیوں پر۔
ایک صارف نے کڑی تنقید کا نشانہ بناتے ہوئے کہا کہ بابراعظم پرینک کے بجائے اپنی فارم پر توجہ دیتے تو پاکستان سہ ملکی سیریز کا پہلا میچ جیت سکتا تھا۔
