پاکستان کے تائیکوانڈو اسٹار ہارون خان نے فجیرہ اوپن انٹرنیشنل تائیکوانڈو چیمپئن شپ (جی-2 کیٹیگری) میں شاندار کارکردگی کا مظاہرہ کرتے ہوئے کانسی کا تمغہ حاصل کرلیا۔
ہارون خان نے تین مسلسل کامیابیاں حاصل کیں لیکن سیمی فائنل میں ایران کے حسین پور علی رضا کے ہاتھوں انہیں شکست کا سامنا کرنا پڑا۔
ابتدائی مقابلوں میں ہارون نے کویت کے الکلی ایف اور ایران کے خواجوی راستین کیے خلاف شاندار فتح حاصل کی، جہاں انہوں نے اپنی حکمت عملی اور طاقتور ککس کا مظاہرہ کیا، تاہم سیمی فائنل میں ایران کے کھلاڑی نے سخت مقابلے کے بعد انہیں شکست دیدی۔
مقابلے کے بعد گفتگو کرتے ہوئے ہارون خان نے اپنے اس اعزاز پر فخر کا اظہار کیا۔ انہوں نے کہا پاکستان کیلئے اس سطح پر میڈل جیتنا میرے لیے اعزاز کی بات ہے، میں مزید محنت کروں گا تاکہ آئندہ مقابلوں میں سونے کا تمغہ حاصل کرسکوں۔
ہارون خان کی اس کامیابی کو ملک بھر میں کھیلوں کے شائقین نے سراہا ہے اور اسے نوجوان کھلاڑیوں کیلئے ایک مثال قرار دیا ہے۔
