پانچ ججز نے اسلام آباد ہائی کورٹ کے ججز کی سینیارٹی کا معاملہ ایک بار پھر اٹھا دیا ہے ۔پانچ ججزنےسینیارٹی لسٹ کیخلاف ریپریزنٹیشن چیف جسٹس اسلام آباد ہائیکورٹ کوبھجوا دی گئی ، چیف جسٹس پاکستان یحییٰ آفریدی کو بھی ججز ریپریزنٹیشن کی کاپی بھجوا ئی گئی ہے ۔
ذرائع کے مطابق چیف جسٹس عامر فاروق کی منظوری سے گزشتہ روز ججز کی سینیارٹی لسٹ جاری کی گئی تھی۔ ریپریزنٹیشن بھجوانے والوں میں جسٹس محسن اختر کیانی، جسٹس طارق محمود جہانگیری ، جسٹس بابر ستار شامل ، جسٹس سردار اعجاز اسحاق خان اور جسٹس ثمن رفعت امتیاز شامل ہیں ۔
جسٹس میاں گل حسن اورنگزیب اور جسٹس ارباب محمد طاہرکی الگ سے رپریزنٹیشن فائل کیےجانے کا امکان ہے ۔ رپریزنٹیشن میں کہا گیاہے کہ جج جس ہائی کورٹ میں تعینات ہوتا ہے اُسی ہائیکورٹ کیلئے حلف لیتا ہے، آئین کی منشاء کے مطابق دوسری ہائیکورٹ میں ٹرانسفر ہونے پر جج کو نیا حلف لینا پڑتا ہے، دوسری ہائیکورٹ میں ٹرانسفر ہونے والے جج کی سینیارٹی نئے حلف کے مطابق طے ہو گی۔
ججز کی جانب سے دائر ریپریزنٹیشن سینیارٹی سے متعلق ہے، ججز کے تبادلے سے کوئی تعلق نہیں، چیف جسٹس یحییٰ آفریدی سے جوڈیشل کمیشن کا اجلاس موخر کرنے کی درخواست کی گئی ہے۔ کہا گیاہے کہ سینیارٹی کا مسئلہ حل ہونےتک چیف جسٹس یحییٰ آفریدی جوڈیشل کمیشن اجلاس ملتوی کریں۔
