امریکی صدر ڈونلڈ ٹرمپ نے کہا ہے کہ صومالیہ میں امریکی فضائی حملوں میں داعش کے بہت سے دہشت گرد مارے گئے ہیں۔
ڈونلڈ ٹرمپ نے صومالیہ میں داعش کے منصوبہ سازوں پر فضائی حملوں کا حکم دیتے ہوئے کہا تھا کہ دہشت گردوں کو نشانہ بنایا جائے، یہ قاتل غاروں میں چھپے ہیں اور امریکا اور اس کے اتحادیوں کو دھمکیاں دیتے ہیں۔
اپنے حکمنامے میں امریکی صدر کا کہنا تھا کہ ہم نے پہلے بھی ان کے غاروں کو تباہ کیا ہے اور اب بھی کریں گے۔
امریکی صدر کا کہنا تھا کہ سابق صدر بائیڈن اور ان کے ساتھیوں نے داعش کے خلاف ٹھوس کارروائی نہیں کی لیکن ہم دہشت گردوں کو ڈھونڈیں گے اور انہیں مار ڈالیں گے۔
ہفتے کے روز اپنے سوشل میڈیا پلیٹ فارم ’ ٹروتھ سوشل ‘ میں ٹرمپ نے خصوصی بیان جاری کیا جس میں انہوں نے کہا کہ غاروں میں چھپے ہوئے داعش کے بہت سے دہشت گرد امریکی فضائی حملوں میں مارے گئے ہیں۔
اپنے بیان میں ٹرمپ کا کہنا تھا کہ آج صبح میں نے داعش کے سینئر منصوبہ سازوں اور صومالیہ میں اسکی قیادت کرنے والے دیگر دہشت گردوں پر فوجی فضائی حملوں کا حکم دیا تھا۔
