سعودی عرب میں نئے لیبر لاز پر عملدرآمد 16 دن بعد کیا جائے گا، نئے قانون کی منظوری سعودی کابینہ نے 6 اگست 2024 کو جاری کی تھی، غیرملکی ملازمین کیلئے معاہدہ لازمی قرار دیدیا گیا، اوور ٹائم پر اضافی اجرت بھی ملے گی۔
سعودی اخبار عکاظ کے مطابق وزارت محنت نے وزراء کونسل کی ہدایات پر عمل کرتے ہوئے نئے قانونِ محنت کے متعدد نکات میں تبدیلیاں کی ہیں، جن میں سرفہرست غیرملکی کارکنوں کے معاہدہ ملازمت سے متعلق ہے۔
مجوزہ نئے قانون میں جس کا نفاذ آئندہ ماہ سے ہونے جارہا ہے کے تحت مملکت میں غیرملکی کارکنوں کا معاہدہ ملازمت ہونا ضروری ہے جس میں معاہدے کے آغاز اور آخری تاریخ کا اندراج اہم ہوگا۔
قانونی تبدیلی سے قبل غیرملکی کارکن کے معاہدہ کی تجدید نہ ہونے کی صورت میں لیبر کارڈ کی مدت ملازمت کی انتہائی مدت تصور کی جاتی تھی جبکہ نئے ضوابط کے تحت ملازمت کے معاہدے کی تجدید نہ ہونے کی صورت میں ایک برس مدتِ ملازمت تصور کی جائے گی۔
تجرباتی مدت کے حوالے سے نئے ضوابط کے مطابق کارکن کی تجرباتی مدت 180 دن کردی گئی ہے اس دوران آجر و اجیر کو اختیار ہوگا کہ وہ معاہدے کو جاری یا ختم کردیں۔
واجبات کے حوالے سے کارکن کو رہائش اور ٹرانسپورٹ یا ان کا متبادل فراہم کرنا آجر کے ذمہ ہوگا، علاوہ ازیں ملازمت ختم کرنے کی صورت میں آجر کو 60 روز کا نوٹس جاری کرنا ہوگا جبکہ کارکن کے مستعفی ہونے کی صورت میں 30 دن کا نوٹس کافی ہوگا۔
اوور ٹائم کے حوالے سے نئی تبدیلی کے مطابق آجر کو اوورٹائم پر اضافی اجرت دینا ہوگی جو فی گھنٹہ کے حساب سے طے کی جائے گی جس میں بنیادی اجرت کا 50 فیصد اضافی شامل ہوگا۔
