وفاقی حکومت کا رائٹ سائزنگ کے تحت 60 فیصد خالی پوسٹیں ختم کرنے کا اعلان کردیا۔
اسلام آباد میں پریس کانفرنس کے دوران وفاقی وزیر خزانہ محمد اورنگزیب نے کہا کہ وزارتوں اور محکموں کی ڈیڑھ لاکھ پوسٹیں ختم کر دی گئیں، 6 وزارتوں کے 80 محکموں کو کم کر کے 40 کیا جائے گا۔
وزیر خزانہ محمد اورنگزیب نے کہا کہ 880 ارب روپے کے اخراجات کم کرنے کے اقدامات مکمل کرلیں گے، مرحلہ وار غیرضروری اداروں کو ختم کیا جائے گا۔
محمد اورنگزیب نے کہا کہ مالی ، سویپرز جیسی خدمات سے متعلق پوسٹوں کو آؤٹ سورس کررہے ہیں، جون تک رائٹ سائزنگ کا کام مکمل ہو جائے گا، امور کشمیرو جی بی اور سیفران کی وزارتوں کو ضم کیاجائے گا، اطلاعات ونشریات اور ثقافتی ورثہ کی وزارتوں کو ضم کریں گے۔
انہوں نے مزید کہا کہ وزارتوں اور ان کے ماتحت 400 اداروں کا جائزہ لیں گے، حکومت کا کام پالیسی دینا ہے ، نجی شعبے کا کام نوکریاں دینا ہے۔ کوشش ہے مرحلہ وارغیرضروری اداروں کو ختم کیا جائے۔
محمد اورنگزیب کا کہنا تھا کہ رائٹ سائزنگ کیلئے طویل وقت سے مختلف اداروں کے ساتھ کام ہورہا ہے، وزیراعظم نےپچھلےسال جون میں رائٹ سائزنگ کیلئےکمیٹی بنائی تھی، وفاقی اخراجات کم کرنے کیلئے لائحہ عمل بنارہے ہیں، وفاقی حکومت کے اخراجات کا حجم کم کرنے کیلئے پرعزم ہیں۔
وزیرخزانہ نے کہا کہ معیشت کو دستاویزی شکل دینے کیلئے ٹیکنالوجی کوترقی دے رہے ہیں، ایف بی آرمیں اصلاحات کاعمل آگے بڑھارہے ہیں، اڑان پاکستان پروگرام پائیدارترقی کے حصول کیلئے معاون ہوگا، الحمداللہ معیشت مثبت سمت میں گامزن ہے۔
