پنجاب حکومت نے صوبے میں پہلی ای ٹیکسی سروس شروع کرنے کا فیصلہ کیا ہے، کئی کمپنیوں نے اسکیم میں بھرپور دلچسپی کا اظہار کردیا۔ وزیر ٹرانسپورٹ بلال اکبر خان کا کہنا ہے کہ وزیراعلیٰ مریم نواز کے اعلان کے مطابق بیروزگار افراد کیلئے اسکیم شروع کررہے ہیں۔
پنجاب حکومت نے پہلی ای ٹیکسی سروس شروع کرنے کا فیصلہ کرلیا، اس حوالے سے الیکٹرک گاڑیاں فراہم کرنیوالی کمپنیوں نے ای ٹیکسی اسکیم میں بھرپور دلچپسی کا اظہار کیا ہے۔
لاہور میں وزیر ٹرانسپورٹ پنجاب بلال اکبر خان کی زیر صدارت ٹرانسپورٹ ہاؤس میں ای ٹیکسی پر تجاویز اور مشاورت کیلئے سیمنار منعقد ہوا، جس میں مختلف سرکاری محکموں، الیکٹرک گاڑیاں بنانے والی کمپنیوں، ٹرانسپوٹرز اور اسٹیک ہولڈرز نے شرکت کی۔
سیمینار میں ای ٹیکسی کیلئے الیکٹرک گاڑیوں کی اقسام، قیمتوں، سروس اور تیکنیکی معاملات پر گفتگو کی گئی۔ ای ٹیکسی سمیت دیگر الیکٹرک گاڑیوں کیلئے چارجنگ اسٹیشنز، بیٹریوں کے معیار اور اسپیئر پارٹس کی آسانی سے فراہمی پر مختلف تجاویز بھی سامنے آئیں۔
صوبائی وزیر ٹرانسپورٹ بلال اکبر خان کا کہنا تھا کہ وزیراعلیٰ پنجاب مریم نواز کے اعلان کے مطابق بیروزگار افراد کیلئے ای ٹیکسی اسکیم شروع کرنے جارہے ہیں۔
انہوں نے کہا کہ ای ٹیکسی اسکیم میں ایسی گاڑیاں فراہم کرنا چاہتے ہیں جو قیمت میں نسبتاً سستی مگر معیار میں بہترین ہوں، اسکیم سے بیروزگاری میں کمی اور عوام کو سستی سفری سہولت عوام کو دستیاب ہوسکے گی۔
