پاک بحریہ کے سربراہ ایڈمرل نوید اشرف نے عمان کے سرکاری دورے کے دوران سلطنت عمان کے سول و عسکری حکام سے اہم ملاقاتیں کیں۔ بحرِ ہند کی سکیورٹی صورتحال اور مشترکہ دفاعی تعاون پر تبادلہ خیال کیا گیا۔
پاک بحریہ کے سربراہ ایڈمرل نوید اشرف نے عمان میں سلطنت عمان کے شاہی دفتر کے وزیر، کمانڈر رائل نیوی آف عمان اور کمانڈر نیشنل ڈیفنس کالج سے الگ الگ ملاقاتیں کیں۔ ملاقاتوں میں بحرِ ہند کی سیکیورٹی صورتحال اور مشترکہ دفاعی تعاون پر تفصیلی تبادلہ خیال کیا گیا۔
نیول چیف نے بحری قزاقی اور اسمگلنگ کی روک تھام میں پاک بحریہ کے کردار پر روشنی ڈالی اور اس عزم کا اعادہ کیا کہ پاکستان بحریہ دیگر علاقائی ممالک کے ساتھ مل کر میری ٹائم سیکیورٹی کے فروغ کی مضبوط حامی ہے۔ مان کے حکام نے بھی علاقائی امن و استحکام میں پاک بحریہ کے کردار کو سراہا۔
دورے کے دوران ایڈمرل نوید اشرف نے سید بن سلطان نیول بیس، رائل عمان بحریہ کے بحری جہاز، میری ٹائم سیکیورٹی سینٹر، نیشنل ڈیفنس کالج، ملٹری ٹیکنیکل کالج اور سلطان قابوس نیول اکیڈمی سمیت اہم بحری تنصیبات کا معائنہ بھی کیا۔ اس دورے سے دونوں برادر ممالک کے مابین دفاعی اور سفارتی تعلقات کو مزید تقویت ملے گی۔
