الیکشن کمیشن آف پاکستان ( ای سی پی ) نے وفاقی دارالحکومت میں بلدیاتی انتخابات نہ ہونے پر مایوسی کا اظہار کرتے ہوئے متعلقہ حکام کو حلقہ بندیوں کیلئے بلا تاخیر ضروری انتظامات کرنے کا حکم دے دیا ۔
بدھ کے روز چیف الیکشن کمشنر سکندر سلطان راجہ کی زیرِ صدارت اسلام آباد میں الیکشن کمیشن کا اجلاس ہوا جس میں شرکا نے اسلام آباد میں بلدیاتی انتخابات نہ ہونے پر مایوسی کا اظہار کیا۔
ترجمان کے مطابق الیکشن کمیشن اسلام آباد میں بلدیاتی انتخابات کرانے کیلئے چار مرتبہ حلقہ بندیاں کر چکا اور جب بھی انتخابات کیلئے تیاری مکمل ہوتی ہے قوانین میں ترامیم کردی جاتی ہیں۔
ترجمان نے بتایا کہ الیکشن کمیشن نے ترمیم شدہ لوکل گورنمنٹ ایکٹ 2015 کےمطابق حلقہ بندیوں کا کام شروع کرنے کا فیصلہ کر لیا ہے جبکہ متعلقہ حکام کو کہا گیا ہے کہ فوری طور پر تمام ضروری انتظامات مکمل کرکے حلقہ بندیوں کا شیڈول منظوری کیلئے الیکشن کمیشن کو پیش کیا جائے۔
