احمد دانیال اور شاہنواز دھانی زمبابوے کیخلاف ون ڈےسیریز سے باہر ہوگئے۔
تفصیلات کے مطابق احمد دانیال اور شاہنواز دھانی زمبابوے کیخلاف ون ڈے سیریز سے باہر ہوگئے۔ شاہنواز دھانی کو ٹریننگ کے دوران بائیں ٹخنے میں چوٹ لگی جبکہ احمد دانیال ہمسٹرنگ انجری کے باعث تیسرے ون دے کیلئے دستیاب نہیں۔
عباس آفریدی اور جہانداد خان متبادل کے طور پر ون ڈے اسکواڈ کا حصہ بن گئے، عباس آفریدی اور جہانداد خان ٹی ٹوئنٹی اسکواڈ میں بھی شامل ہیں۔ ٹی ٹوئنٹی سیریز کیلئےاحمد دانیال کی جگہ عامر جمال کو حصہ بنایا گیا۔
واضح رہے کہ زمبابوے اور پاکستان کی کرکٹ ٹیموں کے درمیان تین ون ڈے انٹرنیشنل میچوں پر مشتمل سیریز کا تیسرا اور فیصلہ کن ون ڈے میچ کل (جمعرات کو ) کوئنز سپورٹس کلب بلاوائیو میں کھیلا جائے گا۔
دونوں ٹیموں کے درمیان تین میچوں کی سیریز 1-1 سے برابر ہے۔ میزبان زمبابوے کی ٹیم نے پہلے ون ڈے میچ میں پاکستان کی ٹیم کو 80 رنز سے شکست دی تھی جبکہ دوسرے ون ڈے میچ میں پاکستان کی ٹیم نے زمبابوے کو نہ صرف 10 وکٹوں سے شکست دی بلکہ تین میچوں کی سیریز 1-1 سے برابر کر دی۔
