مسلم لیگ ( ن ) کی سینئر نائب صدر اور چیف آرگنائزر مریم نواز نے فلسطینیوں سے اظہار یکجہتی کرتے ہوئے مطالبہ کیا ہے کہ عالمی برادری فلسطینیوں کا قتل عام رکوائے۔
اپنے ایک بیان میں چیف آرگنائزر ( ن ) لیگ مریم نواز کا کہنا تھا کہ دنیا بھر کے انصاف اور انسانیت پسند عوام بے گناہوں کا خون بہنے سے روکنے کے لئے اپنا کردار ادا کریں، نہتے اور محصور فلسطینیوں پر وحشیانہ بمباری جنگی جرائم ہیں۔
مریم نواز کا کہنا تھا کہ اسپتالوں، قافلوں، نہتی آبادیوں پر حملے بہادروں اور قانون پر چلنے والی اقوام کا شیوہ نہیں۔
ان کا کہنا تھا کہ فلسطینیوں کے قتل عام پر اسلامی دنیا کے عوام میں شدید غم و غصہ ہے، اسلامی ممالک کی قیادت عوام کی امنگوں کی ترجمانی کرے، اسلامی دنیا قیام امن اور مسئلہ فلسطین کے منصفانہ حل اور محصور فلسطینیوں کی مدد کیلئے آگے بڑھے۔
ان کا مزید کہنا تھا کہ محصور فلسطینیوں کو خوراک اور ادویات کی فراہمی کا بندوبست کیا جائے۔
