سندھ حکومت نے صوبے میں میٹرک اورانٹرکی سطح پرنئی گریڈنگ پالیسی کانوٹیفکیشن جاری کردیا ۔ سندھ پہلا صوبہ ہوگیا جس نے گریڈنگ پالیسی کی منظوری دے دی۔
محکمہ بورڈز وجامعات کے جاری کردہ نوٹیفکیشن کے مطابق سندھ میں نئی گریڈنگ پالیسی کا اطلاق 2025 سے ہوگا ۔ جس کےتحت طلبہ کو نمبروں اور پوزیشنز کی بجائے گریڈز ملیں گے ۔ نئی گریڈنگ پالیسی کے فارمولے کے مطابق پہلی دوسری اور تیسری پوزیشنز ختم کردی جائیں گی ۔
آئی بی سی سی نے نئی گریڈنگ پالیسی کا جو فارمولا طےکیا ہےاس کے مطابق 95 فیصد یا زائد نمبرز کو غیر معمولی اے گریڈ، 90 فیصد نمبر کو شاندار اے گریڈ، 85 فیصد نمبرز کو بہترین اے گریڈ دیا جائے گا۔
اس طرح اسی نمبر کو بہت اچھا بی گریڈ، 75 فیصد نمبرز کو اچھا بی گریڈ، 70 فیصد نمبر کو مناسب اچھا بی گریڈ جبکہ 60 فیصد نمبرز کو اوسط سے اوپر سی گریڈ دیا جائے گا۔ 50 نمبر کو اوسط ڈی گریڈ، 40 تا 49 فیصد نمبرز کو اوسط سے نیچے ای گریڈ اور 40 سے کم نمبرز والوں کوغیر تسلی بخش ایف گریڈ دیا جائے گا۔
