پاک آرمی کی ٹیم نے برطانیہ میں ہونے والی کیمبرین پیٹرول 2024 کی مشق میں شرکت کی اور گولڈ میڈل جیت لیا۔
پاک فوج کے شعبہ تعلقات عامہ (آئی ایس پی آر) کے مطابق پاک آرمی کی ٹیم نے ویلز، برطانیہ میں کیمبرین پیٹرول مشق 2024 میں شرکت کی۔
آئی ایس پی آر کے مطابق پاک آرمی ٹیم نے 4 سے 13 اکتوبر تک مشق میں شرکت کی جس میں 42 ممالک کی 128 ٹیموں نے حصہ لیا۔
آئی ایس پی آر کا بتانا ہے کہ آرمی کی ٹیم نے شاندار کارکردگی کا مظاہرہ کرتے ہوئے گولڈ میڈل حاصل کیا جو پوری قوم اور پاکستان آرمی کے لیے ایک فخر کا لمحہ ہے۔
پاک فوج کے شعبہ تعلقات عامہ کے مطابق 65 ویں مشق کیمبرین پیٹرول نےاپنے پیشہ ورانہ معیار کو برقرار رکھا ہے، مقابلے میں 48گھنٹے میں 60کلومیٹر کافاصلہ طے کرتے ہوئے مخصوص ٹاسک مکمل کرنا تھے۔
ترجمان پاک فوج کے مطابق مشق میں پاک فوج کی ٹیم نے انتہائی پیشہ ورانہ مہارت اور تربیت کا مظاہرہ کیا، یہ یقینی طور پر پوری قوم اورپاکستان آرمی کیلئے فخر کا لمحہ ہے، ان شاء اللہ پاک فوج اسی طرح ہر جگہ پاکستان کا جھنڈا سربلند رکھے گی۔
