مفتی اعظم پاکستان مفتی تقی عثمانی کا کہنا ہے کہ مسلم حکمرانوں نے امریکہ کی غلامی کا تاج پہنا ہوا ہے۔
کراچی میں منعقدہ قومی فلسطین کانفرنس کے دوران خطاب کرتے ہوئے مفتی اعظم پاکستان مفتی تقی عثمانی کا کہنا تھا کہ آج کراچی کی تاریخ کی منفرد رات ہے، تمام مکاتب فکر کے علما موجود ہیں، پوری قوم فلسطینیوں کے ساتھ کھڑی ہے، ہر مسلمان کی ذمہ داری ہے کہ جس طرح ہو فلسطینوں کی مدد کرے، مسلم حکمران اسرائیل کا سر توڑیں، اصل فریضہ حکمرانوں پر عائد ہوتا ہے، زبانی کلامی کے بجائے حکمران عملی اقدامات کریں۔
مفتی اعظم کا کہنا تھا کہ عالمی عدالت فیصلہ دے چکی کہ اسرائیل قتل عام کا مجرم ہے، انشااللہ ایک دن مسجد اقصیٰ کو اسرائیل کے قبضے سے آزاد دیکھیں گے۔
تقی عثمانی کا کہنا تھا کہ مجاہدوں نے ثابت کیا کہ دنیا کی کوئی طاقت مرعوب نہیں کرسکتی، اسرائیل کا حماس کو ختم کرنےکا خواب پورا نہیں ہوا، اسرائیل حماس کو ختم کرنے آیا تھا مگر آج دنیا میں رسوا ہو رہا ہے۔
ان کا کہنا تھا کہ آج کا یہ اجتماع اپنی نوعیت کا منفرد اجتماع ہے، فلسطین کے معاملے پر عالم اسلام ایک اہم نقطے پر ہے لیکن مسلم حکمرانوں نے امریکہ کی غلامی کا تاج پہنا ہوا ہے۔
انہوں نے مزید کہا کہ مسلمان جتنا بھی لاچار ہو حق کے لئے کھڑا ہوتا ہے، اللہ کرے یہ حقیقت حکمرانوں کو بھی نظر آئے، یقین سے کہتا ہوں وقت بدلے گا اور ضرور بدلے گا، آپ ایک دن مسجد اقصیٰ کو آزاد دیکھیں گے۔
