اسٹیٹ بینک آف پاکستان (ایس بی پی) نے ایکسچینج کمپنیوں (ای سیز) کو نقد امریکی ڈالر درآمد کرنے کے لیے ایک سال کی توسیع دے دی ہے۔
ابتدائی طور پر ایکسچینج کمپنیوں کو کارگو یا سیکیورٹی کمپنیوں کے ذریعے امریکی ڈالر کے علاوہ دیگر قابل قبول غیر ملکی کرنسیاں برآمد کرنے اور غیر ملکی کرنسیوں کی برآمد کی تاریخ سے پانچ دن کے اندر پاکستان میں بینکوں میں رکھے گئے اپنے غیر ملکی کرنسی اکاؤنٹس میں مساوی امریکی ڈالر واپس بھیجنے کی اجازت تھی۔ تاہم گزشتہ سال جولائی میں اسٹیٹ بینک نے ایکسچینج کمپنیز مینوئل (ای سی ایم) میں ترمیم کی اور ایکسچینج کمپنیوں کی سہولت کے لیے نقد ڈالر درآمد کرنے کی اجازت دی۔
اسٹیٹ بینک نے کارگو یا سیکیورٹی کمپنیوں کے ذریعے جائز غیر ملکی کرنسیوں کی برآمدی کھیپ کے مقابلے میں نقد امریکی ڈالر کی درآمد کے لئے ای سی ایس میں ایک سال کی مزید توسیع کا اعلان کیا ہے۔
اسٹیٹ بینک کی جانب سے جاری کردہ سرکلر میں کہا گیا ہے کہ اوپن مارکیٹ میں نقد امریکی ڈالر کی مناسب فراہمی کو یقینی بنانے کے لیے نقد ڈالر کی درآمد کی مدت میں 30 جون 2025 تک توسیع کی جاتی ہے۔ جبکہ اس سہولت کے لئے دیگر تمام شرائط و ضوابط میں کوئی تبدیلی نہیں کی جائے گی۔
ایکسچینج کمپنیوں کو اپنے کارگو یا سیکیورٹی کمپنیوں کے ذریعے امریکی ڈالر کیش درآمد کرتے وقت ڈائریکٹر فارن ایکسچینج آپریشنز ڈپارٹمنٹ (ایف ای او ڈی)، ایس بی پی بینکنگ سروسز کارپوریشن (ایس بی پی-بی ایس سی) کراچی کو پیشگی تحریری اطلاع دینا ضروری ہے۔ غیر ملکی کرنسیوں کی برآمد کے لئے طے شدہ طریقہ کار کے مطابق درآمدی کھیپ کی تصدیق کی جائے گی۔
