وزیراعظم سے برطانوی ہائی کمشنر جین میریٹ کی ملاقات ہوئی ، وزیر اعظم شہباز شریف نے دوطرفہ تعلقات مزید مضبوط بنانے کے لیے برطانوی قیادت کے ساتھ مل کر کام کرنے کے عزم کا اعادہ کیا ہے۔
اسلام آباد میں وزیراعظم سے برطانوی ہائی کمشنر جین میریٹ کی ملاقات ہوئی، وزیر اعظم شہباز شریف نے کہا پاکستان اور برطانیہ کے درمیان دیرینہ اور تاریخی تعلقات ہیں،مختلف شعبوں میں تعاون کے ذریعے تعلقات کو مزید وسعت دی جا سکتی ہے، ملاقات میں وزیراعظم نے ملک کو درپیش معاشی چیلنجز سے نمٹنے کی اہمیت کو اجاگر کیا۔
شہباز شریف کا کہنا تھا کہ باہمی دلچسپی کے علاقائی اور کثیر الجہتی امور پر ہم آہنگی اور تعاون کو فروغ دینے کی ضرورت ہے برطانیہ میں مقیم لاکھوں پاکستانی دونوں ممالک کے تعلقات کے پل کی حیثیت رکھتے ہیں،وزیراعظم نے کنگ چارلس کے لیے جبکہ جین میریٹ نے برطانوی حکومت کی جانب سے پاکستان کے لئے نیک خواہشات کا اظہار بھی کیا ۔
