خیبرپختونخوا میں سیکیورٹی فورسز کی دو مختلف کارروائیوں میں 2 دہشت گرد ہلاک ہوگئے۔
آئی ایس پی آر کی جانب سے جاری بیان کے مطابق خیبر پختونخوا میں سیکیورٹی فورسز نے ڈیرہ اسماعیل خان کے علاقے کولاچی اور شمالی وزیرستان کے علاقے میرانشاہ میں دو مختلف کارروائیاں کیں جس میں 2 دہشت گرد مارے گئے۔
پاک فوج کے شعبہ تعلقات عامہ کی جانب سے جاری تفصیلات کے مطابق ڈی آئی خان کے علاقے کولاچی میں خفیہ اطلاعات پر آپریشن کیا گیا، آپریشن میں اکرام نامی دہشت گرد مارا گیا، ہلاک دہشت گرد فورسز اور پولیس چوکیوں پر حملوں سمیت سنگین جرائم میں ملوث تھا۔
رپورٹ کے مطابق دوسری کارروائی شمالی وزیرستان کے علاقے میں میرانشاہ میں کی گئی، جہاں دہشت گردوں کے ٹھکانے کا سراغ لگا کر ایکشن کیا گیا، جھڑپ میں ایک دہشت گرد مارا گیا، ہلاک دہشت گرد سے بھاری مقدار میں گولہ بارود اور اسلحہ برآمد ہوا ہے۔
