ڈالر کی مسلسل گرتی قدر اور معاشی بحالی کے اسٹاک مارکیٹ پر مثبت اثرات ہیں۔
پاکستان اسٹاک ایکسچینج میں مسلسل چوتھے روزتیزی کا رجحان ہے۔ہنڈریڈ انڈیکس 235پوائنٹس بڑھ کر 47315 پوائنٹس پر پہنچ گیا۔
دوسری جانب ملکی تبادلہ مارکیٹوں میں ڈالر کے مقابلے میں روپے کی قدر میں مسلسل 21 ویں روز بھی اضافے کا رجحان برقرار ہے۔
کرنسی ڈیلرز کے مطابق آج انٹربینک میں پاکستانی روپیہ کے مقابلے میں امریکی ڈالر کی قدر مزید 98 پیسے گرکر 283.70 روپے پر آگیا۔دوسری جانب اوپن مارکیٹ میں بھی ڈالر ایک روپے سستا ہوکر 284 روپے پر آ گیا۔ ڈالر کی قدر ساڑھے تین ماہ کی کم ترین سطح پر آگیا۔
قبل ازیں کاروباری دن کے آغاز پرانٹربینک میں ڈالر کی قدر میں ایک روپے کا اضافہ بھی دیکھا گیا، جس سے ڈالر کی قیمت 286 روپے تک پہنچ گیا تاہم بعد میں روپے کی قدر میں دوبارہ اضافہ ہوگیا۔
یاد رہے کہ اسٹیٹ بینک کے مطابق گزشتہ روز بھی انٹربینک میں ڈالر کی قدر میں تنزلی دیکھی گئی، انٹربینک میں ڈالر کی قدر میں 1.04 روپے کی کمی ہوگئی، جس سے ڈالر 285 روپے 72 پیسے پر بند ہوا تھا۔
یاد رہے کہ 5 ستمبر سے لے کر 4 اکتوبر تک انٹربینک میں روپے کی قدر میں مجموعی طور پر تقریباً 23 روپے جبکہ اوپن مارکیٹ میں ڈالر بلند ترین سطح سے سے 46 روپے سستا ہوچکا ہے۔
معاشی ماہرین کے مطابق بڑے پیمانے پر ذخیرہ اندوزوں کے خلاف کریک ڈاؤن سے روپیہ تگڑا ہونے لگا۔ اس وقت روپیہ امریکی ڈالر کے مقابلے میں سات ہفتے کی بلند ترین سطح پر ہے اور پاکستانی روپیہ ستمبر کے دوران دنیا کی بہترین کارکردگی کرنے والی کرنسی بن گیا۔
