سابق امریکی صدر ڈونلڈ ٹرمپ نے قاتلانہ حملے کے بعد ریپبلکن کنونشن ملتوی نہ کرنے کا اعلان کردیا۔
یاد رہے کہ ہفتہ کے روز امریکا کے سابق صدر ڈونلڈ ٹرمپ انتخابی ریلی کے دوران فائرنگ سے زخمی ہوگئے جبکہ حملہ آور مارا گیا، واقعے میں ایک شخص بھی ہلاک ہوا۔
سابق صدر ڈونلڈ ٹرمپ امریکی ریاست پنسلوانیا کے علاقے بٹلر میں منعقد ریلی کے شرکا سے خطاب کے لیے اسٹیج پر موجود تھے جس وقت فائرنگ کا واقعہ پیش آیا۔
حملے کے ایک روز بعد ریپبلکن صدارتی امیدوار ڈونلڈ ٹرمپ نے کنونشن ملتوی نہ کرنے کا اعلان کیا ہے۔
اپنے سوشل میڈیا پلیٹ فارم ٹروتھ پر جاری پیغام میں ٹرمپ نے کہا کہ حملے کے بعد سوچا تھا کنونشن دو دن کے لیے ملتوی کردوں لیکن کسی حملہ آور یا قاتل کے ڈرسے اپنا شیڈول ملتوی نہیں کروں گا۔
ڈونلڈ ٹرمپ کا کہنا تھا کہ کنونشن وقت پر ہوگا اور اور وہ آج ہی وسکانسن روانہ ہو رہے ہیں۔
خیال رہے کہ ٹرمپ پر حملے کے بعد ہاؤس انٹیلی جنس کمیٹی کے چیئرمین مائیک ٹرنر نے بھی تحقیقات کا مطالبہ کردیا ہے۔
اس حوالے سے مائیک ٹرنر کا کہنا تھا کہ ہماری جمہوریت پر گولی چلی ، حملہ آوراس چھت تک کیسے پہنچا واضح ہونا چاہیے۔
ان کا مزید کہنا تھا کہ کل کا واقعہ سیکیورٹی کی ناکامی تھی۔
