سعودی عرب سمیت خلیجی ممالک میں عیدالاضحیٰ آج منائی جارہی ہے۔۔ مسجد الحرام اور مسجدنبویﷺ میں عید کے بڑے بڑے اجتماعات ہوئے۔ امریکا، برطانیہ، کینیڈا اور آسٹریلیا میں بھی آج عید الاضحیٰ کا اعلان کیا گیا ہے۔
تفصیلات کے مطابق سعودی عرب سمیت بعض یورپی ممالک میں عید الاضحیٰ آج منائی جا رہی ہے، مدینہ منورہ اور مکہ مکرمہ میں عیدالاضحیٰ کی نماز ادا کردی گئی، جس میں حاجیوں سمیت لاکھوں افراد نے نماز عید ادا کی۔
دوسری جانب مزدلفہ سے حجاج منی پہنچ رہے ہیں جہاں وہ بڑے شیطان کو کنکریاں مار کر قربانی کریں گے اور سرمنڈوا کر احرام کھول دیں گے، حجاج کرام قربانی کے بعد طواف زیارت اور سعی کرینگے۔
اس کے علاوہ یورپ، امریکا سمیت کئی ممالک میں اس بار بھی دو عیدیں منائی جائیں گی، امریکا، برطانیہ، یورپ اور کینیڈا میں مسلم کمیونٹی کے بعض افراد اتوار اور دیگر پیر کو عید منائیں گے۔
افغانستان میں بھی آج عید ہے۔ پشاورمیں افغان باشندوں نے نماز عید ادا کی۔ غزہ میں فلسطینی شہری آگ اور بارود کی برسات میں عید منارہے ہیں۔ مشکل حالات میں بھی روایتی پکوان تیار کیے جارہے ہیں۔
