پاکستان اور ہواوے کے درمیان کے پاکستانی نوجوانوں کومفت تربیت فراہم کرنے کا معاہدہ طے پاگیا۔
وزیرآئی ٹی شزا فاطمہ کا کہنا ہے کہ وزارت آئی ٹی اور ہواوے کے درمیان فریم ورک معاہدہ طے پاگیا ہے، معاہدہ کے تحت ہواوے شعبہ آئی ٹی میں 2 لاکھ پاکستانی نوجوانوں کومفت تربیت دے گا۔
معاہدے کے تحت پاکستان میں سیف سٹیز کے قیام میں بھی تعاون فراہم کیا جائے گا، پاکستانی نوجوانوں کو آرٹیفیشل انٹیلی جنس کے شعبہ میں بھی تربیت فراہم کی جائے گی۔ ای گورننس اور معیشت کی ڈیجیٹلائزیشن میں بھی بھرپور تعاون کیا جائےگا۔
واضح رہے کہ گزشتہ روز ٹیکنالوجی کے گڑھ چینی شہر شینزن میں بدھ کو پاکستان بزنس کانفرنس کے موقعے پر پاکستان اور چین کے نجی شعبوں کے درمیان مختلف شعبوں میں 32 مفاہمت کی یادداشتوں پر دستخط کیے گئے ہیں۔
جن شعبوں میں مفاہمت کی یادداشتوں پر دستخط کیے گئے ہیں ان میں آئی سی ٹی، ٹیکسٹائل، چمڑے اور جوتے، معدنیات، ادویات اور زراعت و فوڈ پروسیسنگ کے شعبے شامل ہیں۔
پاکستان کے وزیر اعظم آفس سے جاری بیان کے مطابق یہ دستخط پاکستانی تاجروں اور ان کے چینی ہم منصبوں کے درمیان ہونے والی بی ٹو بی ملاقاتوں کے بعد کیے گئے۔
بیان کے مطابق دونوں ممالک کی کاروباری برادری کی دلچسپی کے شعبوں میں الیکٹرانکس اور گھریلو ایپلائینسز، آئی سی ٹی، ٹیکسٹائل، چمڑا اور جوتے، معدنیات اور ادویات وغیرہ شامل تھے۔
دونوں ممالک کے نجی شعبے نے توانائی کے شعبے میں چار، آٹو موبائل کے شعبے میں دو، ثقافتی تعاون میں ایک، انفارمیشن اینڈ کمیونیکیشن ٹیکنالوجیز (آئی سی ٹی) کے شعبے میں چار مفاہمت کی یادداشتوں پر دستخط کیے۔
