کراچی پولیس نے دہشت گردی کا بڑا منصوبہ ناکام بناتے ہوئے بھارتی خفیہ ایجنسی "را" کے 2 دہشتگردوں کو گرفتار کر لیا۔
ایس ایس پی کورنگی حسن سردار نے بتایا کہ کراچی میں کورنگی صنعتی ایریا سے را کے دو دہشتگردوں کی گرفتاری عمل میں آئی ہے ، ملزمان دہشت گردی اور ٹارگٹ کلنگ میں ملوث ہیں۔
ایس ایس پی نے بتایا کہ گرفتار ملزمان سے تخریب کاری کا سامان 2 ہینڈ گرنیڈ، پستول اور گولیاں بھی برآمد ہوئی ہے۔
حسن سردار کا کہنا تھا کہ دہشتگردوں کی شناخت خاورحسین اور جابر کے نام سے ہوئی ہے اور انہوں نے ابتدائی تفتیش کے دوران اہم انکشافات بھی کئے ہیں۔
ان کا کہنا تھا کہ ملزمان بیرون ملک کے ذریعے ملنے والے ٹارگٹ کی ریکی کرتے تھے، تمام تفصیلات اور تصاویر بیرون ملک بھیجتے تھے جبکہ ملزمان نے غیر ملکی بینک اکاؤنٹس سے لاکھوں روپے وصول کیے۔
ان کا مزید کہنا تھا کہ گرفتار ملزمان سے تفتیش جاری ہے جس میں مزید انکشافات متوقع ہیں۔
