اسلام آباد ہائیکورٹ کے ججز کی جانب سے لکھے گئے خط کے تناظر میں وزیراعظم شہباز شریف کی سپریم کورٹ میں چیف جسٹس پاکستان قاضی فائز عیسیٰ سے ملاقات ہوئی ہے۔
وزیراعظم شہباز شریف چیف جسٹس پاکستان قاضی فائز عیسیٰ سے ملاقات کے لیے سپریم کورٹ پہنچے تھے۔ وزیرقانون اعظم نذیر تارڑ اور اٹارنی جنرل منصور عثمان اور سپریم کورٹ کے سینئرجج جسٹس منصور علی شاہ بھی ملاقات میں شریک تھے۔
ذرائع کے مطابق وزیراعظم اور چیف جسٹس پاکستان کی ملاقات چیف جسٹس کے چیمبر میں ہوئی۔ ملاقات میں جوڈیشل یا انکوائری کمیشن بنانے سمیت مختلف آپشنز پر غور کیا گیا۔
چیف جسٹس نے وزیراعظم سے ملاقات کے بعد فل کورٹ اجلاس دوبارہ طلب کرلیا، چیف جسٹس پاکستان کے چیمبر میں تمام ججز 4 بجے ملاقات کریں گے۔
یاد رہے کہ بدھ کے روز اسلام آباد ہائیکورٹ کے ججز کے خط کے معاملے پر چیف جسٹس قاضی فائز عیسیٰ کی سربراہی میں فل کورٹ اجلاس ہوا جس میں خط کا جائزہ لیا گیا۔
فل کورٹ اجلاس میں تمام ججز نے شرکت کی اور اسلام آباد ہائیکورٹ کے 6 ججز کے خط کا آئینی اور قانونی جائزہ لیا جبکہ اجلاس میں خط کے بعد پیدا ہونے والی صورتحال کی آئینی و قانونی حیثیت پر بھی غور کیا گیا۔
