امریکا نے ایرانی وزیر خارجہ حسین امیر عبداللہ کو واشنگٹن کا دورہ کرنے کی اجازت دینے سے انکار کر دیا ۔
غیر ملکی میڈیا رپورٹس کے مطابق امریکی محکمہ خارجہ کے ترجمان میٹ ملر نے بتایا کہ فوگی باٹم نے ایران کی طرف سے امریکی شہریوں کی حراست کا حوالہ دیتے ہوئے واشنگٹن ڈی سی میں ایرانی قونصلیٹ کا دورہ کرنے کی درخواست کو غیر ضروری قرار دیکر مسترد کر دیا۔
انہوں نے کہا کہ امریکا ایرانی حکام اور غیر ملکی حکومتوں کے دیگر اہلکاروں کو اقوام متحدہ اجلاس میں شرکت کیلئے نیویارک جانے کی اجازت دینے کا پابند ہے ،لیکن ہماری ذمہ داری نہیں ہے کہ ہم انہیں واشنگٹن ڈی سی جانے کی اجازت دیں۔
ترجمان میٹ ملر کا کہنا تھا کہ ایران کی طرف سے امریکی شہریوں کی غلط حراست کو دیکھتے ہوئے، دہشت گردی کی ریاستی سرپرستی کے پیش نظر، ہم نہیں سمجھتے کہ اس صورت میں امیر عبداللہ کی درخواست کو منظور کرنا مناسب یا ضروری تھا۔
یاد رہے کہ گزشتہ ہفتے ایک ڈیل کے تحت پانچ امریکیوں کو ایران سے اوربدلے میں پانچ ایرانیوں کو امریکی قیدسے رہا کیا گیا تھا اور بیرون ملک موجود ایران کے 6 ملین ڈالرز کے فنڈز کو غیر منجمد کر دیا گیا تھا۔
